कप्तान अनिल शाहले अर्धशतक प्रहार गरेपछि जनकपुर बोल्ट्सले नेपाल प्रिमियर लिग (एनपीएल) मा लगातार दोस्रो जित हात पारेको छ। बोल्ट्सले आफ्नो पहिलो खेलमा बिराटनगर किंग्सलाई ८ विकेटले पराजित गरेको थियो भने दोश्रो खेलमा पनि समान नतिजा हात पार्यो।
अनिलको अविजित ६२ रन मदतमा जनकपुरले कर्णाली याक्सले दिएको १४२ रनको लक्ष्य १५.१ ओभरमै २ विकेट गुमाएर पूरा गरेको हो । ओपनर अनिलले ४२ बल खेल्दै ६ चौका र ३ छक्का प्रहार गरे ।
अनिलले अर्का ओपनर आसिफ शेखसँग पहिलो विकेटका लागि ८४ रनको साझेदारी गर्दै जितको आधार तयार गरेका थिए । आसिफले २९ बल खेल्दै २ चौका र २ छक्का मदतमा ३६ रन जोडे । दोस्रो विकेटका लागि अनिल र लाहिरु मिलान्थाले ३३ रनको साझेदारी गरे । अघिल्लो खेलमा विराटनगर विरुद्ध अर्धतशक बनाएका मिलान्थाले १३ बलमा २ चौका र २ चौका प्रहार गर्दै २४ रन बनाए ।
जेम्स निशमले अविजित १६ रन योगदान गरे । ८ बल खेलेका उनले २ चौका र १ छक्का प्रहार गरे । कर्णालीका मौसम ढकाल र निशान मक्सुदले समान १ विकेट लिए ।
यस अघि टस जितेर ब्याटिंग गरेको कर्णाली याक्सले २० ओभरमा ७ विकेट गुमाएर १४१ रन बनायो।
कर्णालीको लागि गुल्सन झाले सर्वाधिक ३६ रन बनाए जुन क्रममा २७ बलमा १ चौका र ३ छक्का प्रहार गरे। यस्तै अर्जुन घर्तिले २२ बलमा २ चौका र २ छक्का मद्दतले ३३ रन बनाए। कप्तान सोमपाल कामिले १३ बलमा ३ चौका र १ छक्का मद्दतले २९ रन बनाए। भारतीय स्टार ब्याट्सम्यान शिखर धवनले १४ रन मात्र बनाउन सके जुन क्रममा उनले १४ बलमा ३ चौका प्रहार गरे। धवनलाई क्यानडाका खेलाडी हर्ष थाकरले बोल्ड गरे। सुस्त ब्याटिंग गरेका बाबर हायातले २५ बलमा १२ रन मात्र बनाए। ७९ रनमा ६ विकेट गुमाएको अवस्थामा सातौँ विकेटको लागि ५६ रनको साझेदारी गरे।
जनकपुर बोल्ट्सको बलिंगमा लेग स्पिनर मोहम्मद मोहसिनले २ विकेट लिए जुन क्रममा ४ ओभरमा १४ रन खर्चिए। किशोर महतो, ललित राजवंशी, हर्ष थाकर र जेम्स निशमले १/१ विकेट लिए।
