- विकेटनेपाल – १० चैत्र, शनिवार
भारतीय कप्तान बिराट कोहली इंग्ल्याण्डको प्रसिद्ध काउन्टी च्याम्पियनशिपमा सहभागी हुने भएका छन्। आगामी अगष्ट महिनामा इंग्ल्याण्ड बिरुद्द हुने टेस्ट शृंखलाको तयारीका लागि बिराट काउन्टी क्रिकेटको हिस्सा हुन लागेका हुन्।
यसअघि सन् २०१४ मा भारतले इंग्ल्याण्डको भ्रमण गर्दा कोहलीको ब्याटिंग चल्न सकेको थिएन। सुपर फ्लप रहेका कोहलीले इंग्ल्याण्ड बिरुद्दको ५ टेस्टमा १३.४० को खराब औसतमा १३४ रन मात्र जोड्न सकेका थिए। त्यस शृंखला पछि रन बनाउन नसकेका कोहलीको धेरै आलोचना समेत भएको थियो। तर यसपटक भने भारतीय क्रिकेट टोलिले इंग्ल्याण्डको भ्रमण गर्नुअघि कोहलीले काउन्टी क्रिकेटमा सहभागी हुँदै अभ्यास गर्ने निर्णय लिएको समाचार बाहिरिएको छ।
प्रसिद्ध भारतीय पत्रिका “दि टाइम्स अफ इन्डिया” मा प्रकाशित समाचार अनुसार कोहलीले सर्रे टोलिबाट काउन्टी क्रिकेट खेल्ने छन्। यस सिजनमा भारतका अन्य दुई खेलाडीहरु चेतेश्वर पुजारा र इशान्त शर्माले काउन्टी क्रिकेटका लागि सम्झौता गरिसकेका छन्। पुजाराले योर्कसायर र इशान्तले सुसेक्सबाट काउन्टी क्रिकेट खेल्ने तय भैसकेको छ।
यदि कोहली काउन्टी क्रिकेट खेल्न इंग्ल्याण्ड गएमा उनले अफगानिस्तान बिरुद्द हुने टेस्ट गुमाउने छन्। यहि जुन १४ तारिखबाट अफगानिस्तानले भारत बिरुद्द आफ्नो पहिलो टेस्ट खेल्दै छ। आईसीसीबाट टेस्ट राष्ट्रको मान्यता पाएपछि अफगानिस्तानले भारत बिरुद्दको टेस्टमा कोहलीको अनुपस्थित पाउने निश्चित झैँ भएको छ।
सर्रेको टोलिले यसअघि नै अष्ट्रेलियाका अलराउन्डर मिचल मार्शसंग सम्झौता गरिसकेको छ। यस्तै घरेलु टि-२० प्रतियोगिता टि-२० ब्लास्टका लागि भने सर्रेको टोलिमा एरन फिन्च समेत रहेका छन्।
