- विकेटनेपाल, बैशाख-१३ , शुक्रबार, सुर्खेत
सुर्खेतमा जारि वाईवाई कर्णाली प्रिमियर लिगको दोश्रो संस्करणको दोश्रो दिनको पहिलो खेलमा शक्ति गौचन कप्तानीको न्यु होराइजन बुटवलले जित हाँसिल गरेको छ ।
कालिन्चोक क्रिकेट मैदानमा शुक्रबार बिहान सम्पन्न समुह ‘बि’ अन्तर्गतको खेलमा न्यु होराइजन बुटवलले महेन्द्रनगर क्रिकेट एकेडेमीलाई ७१ रनले सहजै पराजित गर्यो।
टस जितेर पहिले ब्याटिंग गरेको होराइजनले २० ओभरमा ४ विकेट गुमाएर १६६ रनको योगफल तयार गरेको थियो। जवाफमा १६७ रनको लक्ष्य पछ्याएको महेन्द्रनगरले १९.१ ओभरमा ९५ रनमा सम्पूर्ण विकेट गुमाउन पुग्यो।
होराइजनको जितमा प्लेयर अफ द म्याच समेत चुनिएका सुनिल धमलाले ६० रन बनाए। नेपाली राष्ट्रिय टिमको लागि खेलीसकेका सुनीलले ओपनिंग ब्याटिंग गर्दै ४० बलमा ८ चौका र २ छक्का प्रहार गरे। यस्तै अर्जुन रायमाझीले ४० तथा सुरज दराईले अविजित २१ रन बनाए।
बलिंगतर्फ होराइजनका कप्तान समेत रहेका पुर्व राष्ट्रिय क्रिकेटर शक्ति गौचनले सर्वाधिक ३ विकेट लिए। गौचनले ४ ओभरमा २३ रन खर्चिए। बिकाश श्रेष्ठ र सुनिल धमलाले २/२ विकेट लिए।
महेन्द्रनगरको लागि सन्तोष भट्टले ब्याटिंगमा २२ रन र बलिंगमा २ विकेट लिए पनि टिमलाई जित नजिक पुर्याउन सकेनन्। स्कोरकार्ड
खेलको फोटोहरु :-
कर्णाली प्रिमियर लिग अन्तर्गत बिहिबारको उद्घाटन खेलमा कर्णाली-११ ले लालीगुराँस क्रिकेट क्लबलाई ८ विकेटले पराजित गरेको थियो।
प्रतियोगितामा कुल ८ टिमहरु सहभागी छन् जसलाई २ समुहमा बिभाजन गरिएको छ। समूह ‘ए’ मा त्रिभुवन आर्मी क्लब, मध्यपश्चिम क्रिकेट क्लब बाँके, आयोजक कर्णाली एघार र लालिगुराँस क्रिकेट एकेडमी झापा रहेका छन्। त्यस्तै समूह ‘बि’ मा सशस्त्र प्रहरी बलको एपीएफ क्लब, महेन्द्रनगर क्रिकेट एकेडमी कञ्चनपुर, न्यु होराइजन बुटवल र हिमालयन क्रिकेट एकेडेमी काठमाडौं रहेका छन्।
दुवै समूहबाट उत्कृत हुने २/२ टिमले सेमीफाइनलमा स्थान बनाउनेछन्।
प्रतियोगिताको विजेताले नगद ५ लाख रुपैयाँ तथा उप-बिजेताले नगद २ लाख रुपैयाँ प्राप्त गर्नेछन्। यस्तै प्लेयर अफ द म्याच घोषित हुने खेलाडीले ३५०० रुपैयाँ तथा प्रतियोगितामा उत्कृस्ट घोषित हुने बलर र ब्याट्सम्यानले समान २०,००० र प्लेयर अफ द सिरिजले ५०,००० प्राप्त गर्नेछनन्।
