- विकेटनेपाल, बैशाख १२ , बिहिबार , सुर्खेत
कर्णाली क्रिकेट एकेडेमीको आयोजनामा वाईवाई कर्णाली प्रिमियर लिगको दोश्रो सिजन ( केपीएल-२ ) सुर्खेतमा सुरु भएको छ। कर्णाली प्रदेशका सामाजिक विकास मन्त्रि दल रावलले प्रतियोगिताको उद्घाटन गर्नु भयो ।
प्रतियोगिताको उद्घाटन खेलमा झापाको लालीगुराँस क्रिकेट क्लबलाई आयोजक टिम कर्णाली-११ ले ८ विकेटले सहजै पराजित गर्यो।
सुर्खेत स्थित कालिन्चोक क्रिकेट मैदानमा सम्पन्न खेलमा टस जितेर ब्याटिंग रोजेको लालीगुराँस क्रिकेट क्लबले २० ओभरमा सम्पूर्ण विकेट गुमाएर १०१ रनको योगफल तयार गरेको थियो।
लालीगुराँसको लागि रोनक दक्षिणीले सर्वाधिक २१ रन , अजय यादबले २०, यश कनदियाले १६ तथा दिपेन योगीले १५ रन बनाए।
कर्णाली-११ को लागि बलिंगमा यु-१९ राष्ट्रिय क्रिकेटर समेत रहेका किशोर महतो र दिवान पुनले ३/३ विकेट लिए। किशोरले ४ ओभरमा १ मेडन ओभर गर्दै १३ रन मात्रै खर्चिए। यस्तै अर्का यु-१९ राष्ट्रिय क्रिकेटर जितेन्द्र ठकुरीले २ विकेट तथा कृष्ण कार्कीले १ विकेट लिए।
१०२ रनको लक्ष्य आयोजक कर्णाली-११ ले १४.२ ओभरमा मात्र २ विकेट गुमाएर पुरा गर्यो।
लक्ष्य पछ्याउने क्रममा कर्णाली-११ का कप्तान रबिन्द्र जंग शाहीले अविजित ४५ रन बनाए। अन्डर-१९ राष्ट्रिय क्रिकेटर रहीसकेका शाहीले ४७ बलमा ६ चौका र छक्का प्रहार गरे। यस्तै निश्चल रावलले ३१ रन बनाए। ( स्कोरकार्ड )
खेलको प्लेयर अफ द म्याच किशोर महतो घोषित भए जसले ३ हजार ५ सय रुपैयाँ प्राप्त गरे।
प्रतियोगिता अन्तर्गत शुक्रबार २ खेलहरु खेलिनेछन् । बिहानको खेलमा न्यु होराइजन बुटवल र महेन्द्रनगर क्रिकेट एकेडेमी तथा दिउसोको खेलमा त्रिभुवन आर्मी क्लब र लालीगुराँस क्रिकेट एकेडेमीले प्रतिस्पर्धा गर्नेछन्।
प्रतियोगितामा कुल ८ टिमहरु सहभागी छन् जसलाई २ समुहमा बिभाजन गरिएको छ। समूह ‘ए’ मा त्रिभुवन आर्मी क्लब, मध्यपश्चिम क्रिकेट क्लब बाँके, आयोजक कर्णाली एघार र लालिगुराँस क्रिकेट एकेडमी झापा रहेका छन्। त्यस्तै समूह ‘बि’ मा सशस्त्र प्रहरी बलको एपीएफ क्लब, महेन्द्रनगर क्रिकेट एकेडमी कञ्चनपुर, न्यु होराइजन बुटवल र हिमालयन क्रिकेट एकेडेमी काठमाडौं रहेका छन्।
दुवै समूहबाट उत्कृत हुने २/२ टिमले सेमीफाइनलमा स्थान बनाउनेछन्।
प्रतियोगिताको विजेताले नगद ५ लाख रुपैयाँ तथा उप-बिजेताले नगद २ लाख रुपैयाँ प्राप्त गर्नेछन्। यस्तै प्लेयर अफ द म्याच घोषित हुने खेलाडीले ३५०० रुपैयाँ तथा प्रतियोगितामा उत्कृस्ट घोषित हुने बलर र ब्याट्सम्यानले समान २०,००० र प्लेयर अफ द सिरिजले ५०,००० प्राप्त गर्नेछनन्।
प्रतियोगिता अवलोकन गर्न आउने दर्शकको लागि टिकट मूल्य ३० रुपैयाँ देखि पाँचसय रुपैयाँसम्म तोकिएको छ। दर्शकको मनोरंजनको लागि प्रत्येक दिन एकजना दर्शकलाई गोलाप्रथाबाट टिभी सहित अन्य विभिन्न आकर्षक उपहार प्रदान गरिनेछ। साथमा फाइनल खेलमा एकजना दर्शकलाई मोटरसाइकल समेत प्रदान गरिने आयोजकले बताएको छ।
