काठमाडौँ मुलपानी क्रिकेट मैदानमा जारि सिनियर काठमाडौँ जिल्ला छनौट प्रतियोगिता अन्तर्गत बुधबार सम्पन दोश्रो दिनको खेलमा महाबिर क्रिकेट क्लब र ग्रेट हिमालय क्रिकेट एकेडेमीले जित हात पारेका छन्।
दिनको पहिलो खेलमा महाबिर क्रिकेट क्लबले यंगाल क्रिकेट क्लबलाई १० विकेटले पराजित गर्यो। यंगालले दिएको १ सय २० रनको लक्ष्य महाबिर क्लबले विकेट नगुमाई १४ ओभरमा पुरा गर्यो। महाबिरको जितमा प्लेयर अफ द म्याच चुनिएका रोबिन जोशीले अविजित ८४ रन बनाए। जोशीले ४६ बलमा १२ चौका र २ चौका प्रहार गरे। यस अघि यंगाललाई सस्तोमा समेट्न रास्ट्रिय क्रिकेटर समेत रहेका महाबिरका बलर सन्जम रेग्मीले ३ विकेट ( ५-२-९-३ ) लिएका थिए।
दोश्रो खेलमा ग्रेट हिमालय क्रिकेट एकेडेमीले फरेभर क्रिकेट बोइज क्लबलाई ८७ रनले पराजित गर्यो। ग्रेट हिमालयले दिएको १ सय ९२ रनको लक्ष्य पछ्याउने क्रममा फरेभरले १०४ रनमा सबै विकेट गुमायो। ग्रेट हिमालयको जितमा राष्ट्रिय क्रिकेटर इशान पाण्डेले शतकीय योगदान दिए। पाण्डेले ७८ बलमा १४ चौका र १ छक्का प्रहार गरे। यस्तै बलिंगमा अरीयो पौडेलले ४ विकेट ( ५-०-२५-४ ) लिए।
काठमाडौँका १२ क्लब तथा एकेडेमीका टोलिहरु सहभागी प्रतियोगिता फाल्गुन २९ गतेसम्म चल्नेछ। प्रतियोगिताको सबै खेलहरु २५ ओभर प्रति इनिंगको खेलाइने छ। चैतमा हुने प्रधानमन्त्री कप प्रतियोगिताको छनौट स्वरूप प्रतियोगिता आयोजना गरिएको हो।
