- विकेटनेपाल – १२ चैत्र, मंगलवार
अप्रिल १० देखि २० तारिकसम्म मलेसियामा आयोजना हुने आईसीसी अन्डर यु-१९ विश्वकप छनौट प्रतियोगिताको तयारी स्वरूप भारत भ्रमणमा रहेको नेपाली अन्डर-१९ क्रिकेट टिमले चौथो अभ्यास खेलमा आन्द्रा स्टेट अन्डर-१९ क्रिकेट टिमको सामना गरिरहेको छ।
खेलमा पहिले ब्याटिंग गरेको नेपालले निर्धारित ५० ओभरमा ९ विकेट गुमाउदै २२१ रनको योगफल तयार गरेको छ र २२२ रनको लक्ष्य आन्द्रा स्टेट यु-१९ टिमलाई प्रस्तुत गरेको छ।
मध्यम सुरुवात गरेको नेपाली यूवा टोलीले ३३ रनको स्कोरमा पहिलो विकेट गुमाएको थियो। तर त्यसपश्चात भने लगातार विकेट झर्दा कुनै समय नेपाल १३३/८ को खराब अवस्थामा पुग्यो।
नेपालको इनिंगलाई सम्मानजनक स्कोरसम्म पुर्याउन नवौं विकेटका लागि कुशल मल्ल र राशिद खानले ६७ रनको साझेदारी गरे। उत्कृस्ट ब्याटिंग गरेका कुशल ४८ रनमा अविजित रहंदा राशिद भने ४१ रनमा पभेलियन फर्किए। मात्र ५७ बलमा २ चौका र २ छक्का सहित कुशलले ४८ रन जोड्दा राशिदले आक्रामक ब्याटिंग गर्दै ४० बलमा ४ चौका र १ छक्का सहित ४१ रन जोडे।
यसअघि नेपालका लागि पवन सर्राफले ३२, रोहित कुमार पौडेलले २२, भिम शार्कीले १७ र रित गौतमले १५ रनको व्यक्तिगत योगदान गरेका थिए।
आन्द्राको बलिङ्गमा दुर्गा कुमार, कार्तिक रेड्डी र महेश माधवले समान २-२ विकेट हात पारे।
