- विकेटनेपाल, बैशाख २४
डिफेन्डिङ च्याम्पियन चेन्नाई सुपर किंग्सलाई ६ विकेटले पराजित गर्दै मुम्बई इन्डीएन्स आईपीएलको फाइनलमा प्रवेश गरेको छ।
मुम्बई आईपीएलको फाइनल प्रवेश गरेको यो पाँचौ पटक हो। सन् २०१३, २०१५ र २०१७ मा मुम्बईले आईपीएल उपाधि जितेको थियो भने सन् २०१० मा फाइनलमा पराजित भएको थियो।
मुम्बईसंग पराजित भएपछि अब फाइनल प्रवेशको लागि चेन्नाईले दोश्रो मौका कुर्नु पर्नेछ। भोलि हुने इलिमीनेटरमा दिल्ली र हैदराबाद बीचको खेलको विजेतासंग फाइनल प्रवेशको लागि चेन्नाईले दोश्रो क्वालिफायर शुक्रबार खेल्नेछ।
सुर्यकुमार यादबको उत्कृस्ट इनिंग
चेन्नाईको एमए चिदम्बरम मैदानमा सम्पन्न पहिलो क्वालिफायर खेलमा चेन्नाईले टस जितेर पहिले ब्याटिंग गर्दै दिएको १३२ रनको लक्ष्य मुम्बईले १८.३ ओभरमा ४ विकेट गुमाएर पुरा गर्यो।
लक्ष्य पछ्याउने क्रममा ओपनर तथा कप्तान रोहित शर्मा ४ तथा क्विन्टन डीकक ८ रन बनाएर आउट भएपछि तेश्रो विकेटको लागि सुर्यकुमार यादब र इशान किशानले ८० रनको साझेदारी गर्दै मुम्बईको योगफल १०० पार गराएका थिए।
इशान १४ औं ओभरमा २८ रन बनाएर आउट भए जसलगत्तै क्रुनल पान्ड्या खाता नखोली आउट भए। दुवैलाई इमरान ताहिरले आउट गरे।
त्यसपछि पनि एक किनार सुर्यकुमार यादबले सम्हालीरहे। हार्दिक पान्ड्यासंग पाँचौ विकेटको लागि ३१ रनको साझेदारी गर्दै जितसम्म पुर्याए।
सुर्यकुमार ७१ रनमा अविजित रहे जुन क्रममा ५४ बलमा १० चौका प्रहार गरे भने हार्दिकले १३ रन बनाए।
चेन्नाई बलर इमरान ताहिरले २ विकेट ( ४-०-३३-२ ) तथा दिपक चाहर र हरभजन सिंहले १/१ विकेट लिए।
चेन्नाईको ब्याटिंग
यस अघि चेन्नाईले निर्धारित २० ओभरमा ४ विकेट गुमाएर १३१ रनको योगफल तयार गरेको थियो।
टस जितेर ब्याटिंग रोजेको चेन्नाईको सुरुवात राम्रो हुनसकेन। ओपनर फाफ डु प्लेसिस ६ , शेन वाटसन १० तथा सुरेश रैना २६ रन बनाएर आउट हुँदा ३२ रनमा चेन्नाईले ३ विकेट गुमाउन पुग्यो।
चौथो विकेटको लागि मुरली विजय र अम्बाती रायडुले ३३ रनको साझेदारी गरे। विजय २६ रन बनाएर आउट भएपछि रायडु र कप्तान महेन्द्र सिंह धोनीले टिमलाई अघि बढाएका थिए।
धोनी र रायडुले पाँचौ विकेटको लागि अविजित ६६ रनको साझेदारी गरे। रायडुले ३७ बलमा ३ चौका र १ छक्का मदतले ४२ रन तथा धोनीले २९ बलमा ३ छक्का मदतले ३७ रन बनाए।
किफायती बलिंग गरेका मुम्बईको लागि राहुल चाहरले ४ ओभरमा १४ रन मात्र खर्चेर २ विकेट लिए। क्रुनल पान्ड्या ( ४-०-२१-१ ) र जयन्त यादब ( ३-०-२५-१ ) ले १/१ विकेट लिए।
खेलको फोटोहरु :-
Photo – IPLT20.com
