अष्ट्रेलियामा जारि १० औं संस्करणको बिग ब्यास लिग अन्तर्गत आइतबार सम्पन्न ४२ औं खेलमा ग्लेन म्याक्स्वेल कप्तानीको मेलबर्न स्टार्सले एरोन फिंच कप्तानीको मेलबर्न रेनिगेड्समाथि ६ विकेटको सहज जित दर्ता गरेको छ।
जितसंगै स्टार्स ११ खेलमा समान ५ जित र ५ हारपछि २३ अंक जोड्दै अंकतालिकाको तेस्रो स्थानमा उक्लिएको छ। जारि सिजन ११ खेलमा नवौं हार बेहोरेको रेनिगेड्स भने ९ अंकसहित अंकतालिकाको पुछारमा यथावत रहेको छ।
Sealed with a Maddinson six!
The Melbourne Derby is green 💚 #BBL10 pic.twitter.com/OxjG1VDa7w
— KFC Big Bash League (@BBL) January 17, 2021
मेलबर्न स्थित मेलबर्न स्टार्स मैदानमा सम्पन्न खेलमा १५१ रनको मध्यम लक्ष्य पछ्याएको स्टार्सले ५ बल बाँकी रहँदा ४ विकेट गुमाएर लक्ष्य पुरा गर्यो। उसको लागि मार्कस स्टोइनिस (५ चौका र २ छक्का) र निक लार्किनले (५ चौका) समान ३२ बलमा समान सर्वाधिक ४३ रन बनाए। म्याक्स्वेल र निक म्याडिनसनले (अविजित) समान २० तथा हिल्टन कार्टराइटले अविजित १२ रनको योगदान दिए।
अन्तिम २ ओभरमा स्टार्सलाई जितका लागि १५ रनको आवश्यकता रहेको थियो। कार्टराइटले नुर अहमदको १९ औं ओभरमा १ चौका हिर्काउँदै ११ रन बटुलेपछि स्टार्सलाई अन्तिम ओभरमा मात्र ४ रनको खाँचो रह्यो। अन्तिम ओभरको पहिलो बलमै म्याडिनसनले छक्का प्रहार गर्दै स्टार्सलाई जित दिलाएका थिए।
यसअघि पछिल्लो खेलमा विस्फोटक ब्याटिंग गरेका आन्द्रे फ्लेचर ७ रनमा आउट भएपछि स्टोइनिस र लार्किनले दोस्रो विकेटको लागि ३७ रनको साझेदारी गर्दै स्टार्सको इनिंग सम्हाले। स्टोइनिस आउट भएपछि लार्किनले कप्तान म्याक्स्वेलसँग तेस्रो विकेटको लागि ५१ रनको अर्धशतकीय साझेदारी गर्दै स्टार्सलाई जिततर्फ उन्मुख पारे। अन्तिममा म्याडिनसनले १५ बलमा अविजित २० तथा कार्टराइटले ६ बलमा अविजित १२ रन बनाउँदै स्टार्सलाई जितसम्म डोर्याएका थिए।
रेनिगेड्सको बलिंगतर्फ केन रिचार्डसनले (४-०-२४-२) सर्वाधिक २ विकेट लिए भने विल सदरल्याण्ड र पिटर हत्जोग्लूले समान १ विकेट हात पारे।
यसअघि ब्याट फिलिप जितेर ब्याटिंग रोजेको रेनिगेड्सले १९.५ ओभरमा सम्पूर्ण विकेट गुमाएर मात्र १५० रन बनाएको थियो। रेनिगेड्सको ब्याटिंगमा साम हार्परले ५२ बलमा ३ चौका र १ छक्काको मद्धतमा सर्वाधिक ६३ रन बनाए। मॅकेन्झी हार्वेले २९, शन मार्शले २४ तथा इमाद वासिमले १५ रनको योगदान दिए।
Good comeback from the @StarsBBL bowlers there!
The @RenegadesBBL are all out for 150 #BBL10 pic.twitter.com/4QwrQwD6Yx
— KFC Big Bash League (@BBL) January 17, 2021
इनिंगको दोस्रो बलमै म्याक्स्वेलले कप्तान फिंचलाई आउट पारे। त्यसपछि, हार्पर र मार्शले दोस्रो विकेटको लागि ७८ रनको साझेदारी गर्दै रेनिगेड्सको इनिंग सम्हाले। त्यसपछि ७८/१ को स्थितिबाट ब्याटिंग धराशायी बन्दा रेनिगेड्स १५० रनमै समेटिएको थियो।
स्टार्सको बलिंगतर्फ लियाम हैचरले (४-०-२९-३) सर्वाधिक ३ विकेट लिए। जाहिर खान र बिल्ली स्टानलेकले समान २ तथा एडाम जम्पा र कप्तान म्याक्स्वेलले समान १ विकेट हात पारे।
