धनगढीको फाप्ला क्रिकेट मैदानमा जारि प्रधानमन्त्री कप महिला राष्ट्रिय टि-ट्वान्टी प्रतियोगिताको सेमीफाइनल समीकरण पुरा भएको छ।
समुह ‘ए’ बाट विजेताको रुपमा प्रदेश नम्बर-१ र उपविजेताको रुपमा लुम्बिनी प्रदेश तथा समुह ‘बि’ बाट विजेताको रुपमा एपीएफ र उपविजेताको रुपमा सुदूरपश्चिम प्रदेश सेमीफाइनल प्रवेश गरेका छन्। कर्णाली प्रदेश, गण्डकी प्रदेश, प्रदेश-२ र बागमती प्रदेश पहिलो चरणबाट बाहिर भए।
पहिलो सेमीफाइनल खेल शनिवार बिहान ९ बजे प्रदेश नम्बर-१ र सुदूरपश्चिम प्रदेश बीच तथा दोश्रो सेमीफाइनल शनिवारनै दिउँसो १ बजे एपीएफ र लुम्बिनी प्रदेश बीच खेलिनेछ।
समुह चरणमा एपीएफ र प्रदेश-१ ले सबै तिन वटा खेल जित्दै सेमीफाइनलमा स्थान बनाएको हो। लुम्बिनी र सुदूरपश्चिमले समान दुई जित र एक हार बेहोरे।
प्रतियोगिताको अघिल्लो संस्करणको फाइनलमा प्रदेश-१ ले एपीएफलाई पराजित गरेको थियो।
