बुधबार सार्वजनिक आर्थिक वर्ष २०७६/७७ को बजेट अन्तर्गत सरकारले खेलकुद विकासको लागि ३ अर्ब ९९ करोड रुपैयाँ विनियोजन गरेको छ।
जारी गरेको बजेट अन्तर्गत सरकारले मुलपानी क्रिकेट मैदान आगामी दुई वर्षमा सम्पन्न गर्ने योजना सहित १० करोड बजेट विनियोजन गरेको छ ।
अर्थमन्त्री युवराज खतिवडाले जारी गरेको बजेटमा सबै प्रदेशमा सुविधा सम्पन्न रंगशाला र सबै स्थानीय तहमा एक खेलग्राम निर्माण गर्न लागि योजना सुनाएको छ । यस्तै सरकारले काठमाडौँ उपत्यकामा सुविधा सम्पन्न अन्तर्राष्ट्रिय स्तरको खेलकुद परिसर निर्माण गर्ने पनि योजना सुनाएको छ । त्यसका लागि सरकारले ४० करोड बजेट विनियोजन गरेको छ।
संघ, प्रदेश र स्थानीय तहमा खेलाडीको प्रशिक्षण, क्षमता विकासका लागि प्रोत्साहन गरिने उल्लेख गरेको छ। यसैगरी सरकारले काठमाडौंमा एउटा क्रिकेट एकेडेमी समेत निर्माण गर्ने र निजी क्षेत्रले लगानीमा बन्ने खेल मैदानलाई प्रोत्साहन गरिने जनाएको छ । यस्तै एक विद्यालय एक खेलकुद शिक्षक नियुक्त गर्न सरकारले ५ अर्ब रुपैयाँ छुट्याएको छ।
नेपालमा आगामी डिसेम्बरमा आयोजना हुने १३औं दक्षिण एसियाली खेलकुद (साग) र २०७७ सालमा गण्डकी प्रदेशमा आयोजना हुने नवौं राष्ट्रिय खेलका लागि आवश्यक बजेट छुट्याइएको सरकारले जनाएको छ । त्यसका लागि भौतिक पूर्वाधार निमार्णका लागि विशेष प्राथमिकता दिने उल्लेख गरेको छ ।
यस अघि गत आर्थिक वर्ष युवा तथा खेलकुद मन्त्रालयका लागि छुट्याइएको बजेट मध्ये एसियाली खेलकुद, दक्षिण एसियाली खेलकुद र आठौं खेलकुद प्रतियोगिताका लागि २ अर्ब ४ करोड बजेट थियो । यो मध्ये दक्षिण एसियाली खेलकुद (साग) निर्धारित मितिमा हुन नसक्दा उक्त प्रतियोगिता डिसेम्बरका लागि सारिएको थियो ।
