मलेसियामा जारि आइसीसी महिला टी-२० विश्वकप एसिया क्षेत्रको छनोट अन्तर्गत लगातार तेश्रो जित दर्ता गर्ने क्रममा नेपालले भुटानलाई ३ विकेटले पराजित गरेको छ । यस अघि नेपालले मलेसिया र बहराईनलाई पराजित गरिसकेको छ।
जितका लागि पाएको ४० रनको लक्ष्य नेपालले १३.२ ओभरमा पुरा गर्यो । नेपालका लागि रुविना क्षेत्रीले सर्वाधिक १२ रन बनाइन् । कविता जोशीले ९ रन, सीता राना मगरले ८, पूजा महतोले ३ रन बनाइन् । अन्य ब्याट्सम्यान चल्न सकेनन् । नेपालले सुरुवाती ५ विकेट १६ रनको योगफलमा गुमाएपछि कप्तान रुबिनाले एक किनार सम्हाल्दै जितसम्म पुर्याईन्।
भुटानका लागि अन्जुली घलेले ३, छिरिङ जाङमोले २, अन्जु गुरुङ र सोनमले १-१ विकेट लिए । यसअघि भुटानले ८ विकेटको क्षतिमा ३९ रन बनाएको थियो ।
भुटानका लागि दिचेन वाङ्मोले २१ रन जोड्नु बाहेक अरुले दोहोरो अंकमा रन बनाउन सकेनन् । भुटानका ४ जना खेलाडी शून्य रनमा आउट भएका थिए । दुई जनाले १-१ रन जोडे भने एक जनाले ३ रन मात्रै बनाए ।
टस जितेर पहिलो बलिङ गरेको नेपालका लागि पूजा महतोले ३ विकेट लिइन् । यस्तै कविता कुँवर, रुविना क्षेत्री र खुसी डंगोलले १-१ विकेट लिए ।
तेश्रो जितसंगै नेपालले सेमीफाइनल पुग्ने सम्भावना बलियो बनाएको छ। आफ्नो चौंथो खेल नेपालले भोलि कतार तथा पाँचौ खेल बुधबार ( सेप्टेम्बर ६ ) युएई विरुद्ध खेल्नेछ। दुई मध्ये एक खेलको जितले नेपाल सेमीफाइनल पुग्ने पक्का छ भने दुवै खेलमा हार बेहोरेको खण्डमा पनि अन्य टिमको नतिजाको आधारमा सेमीफाइनल पुग्ने सम्भावना रहेको छ।
