युएईमा सुरु भएको महिला टि-ट्वान्टी विश्वकप एसिया क्षेत्र छनोट प्रतियोगिता अन्तर्गत आफ्नो पहिलो खेलमा नेपाल हंगकंगसंग प्रतिस्पर्धा गर्दैछ।
आईसीसी क्रिकेट एकेडेमी मैदानमा टस हारेर ब्याटिंग गरेको नेपालले निर्धारित २० ओभरमा ३ विकेट क्षेतीमा १०४ रन बनाउदै हंगकंगलाई १०५ रनको लक्ष्य प्रस्तुत गरेको छ। नेपालको लागि सिता राना मगरले सर्वाधिक ४० रन योगदान दिईन् जुन क्रममा ५७ बलमा ४ चौका प्रहार गरिन्। यस्तै इन्दु बर्माले ३७ बलमा ३ चौका मद्दतले अविजित ३१ रन बनाईन्।
ओपनर कविता कुँवर पहिलो ओभरमा खाता नखोली तथा काजल श्रेष्ठ ४ रन बनाएर आउट भएपछि तेश्रो विकेटको लागि ओपनर सिता राना मगरले इन्दु बर्मासंग ८१ रनको साझेदारी गरिन्। सिता अन्तिम ओभरमा रन आउट हुन पुगिन्। हंगकंग बलर चान का मान ( ४-१-१२-१ ) र केरी चानले ( ४-०-१६-१ ) समान एक विकेट लिए।
सन् २०२३ को फेब्रुअरीमा दक्षिण अफ्रीकामा आयोजना हुने महिला विश्वकप टि-ट्वान्टी विश्वकपको छनोट अन्तर्गत नेपालले पहिलो खुड्किलोको रुपमा एसिया छनोट खेल्न लागेको हो। प्रतियोगितामा नेपाल सहित आयोजक युएई, भुटान, हंगकंग, मलेसिया र कुवेत गरि ६ टोलि सहभागी छन्। सहभागी ६ टिमले एकअर्का संग एक/एक खेलमा प्रतिस्पर्धा गरेपछि उत्कृस्ट हुने एउटा टिम आगामी वर्ष आयोजना हुने ग्लोबल छनोट प्रतियोगितामा छनोट हुनेछ।
