रोमान्चक खेलमा घरेलु टोलि मलेसियालाई ५ रनले पराजित गर्दै नेपालले महिला टि-ट्वान्टी विश्वकप एसिया छनोट प्रतियोगितामा विजयी सुरुवात गरेको छ।
नेपालले दिएको ८५ रनको लक्ष्य पछ्याएको मलेसियाले पुरै २० ओभर ब्याटिंग गरेता पनि ९ विकेट गुमेर ७९ रन मात्र बनायो।
लक्ष्य पछ्याउने क्रममा ७० रनमा मात्र ३ विकेट गुमाएको अवस्थाबाट नेपालले खेलमा उत्कृस्ट पुनरागमन गर्दै जित दर्ता गर्यो। सत्रौं ओभरमा अफ स्पिनर कविता जोशीको ओभरमा मलेसियाले एउटा रन आउट सहित २ विकेट गुमायो भने मात्र २ रन मात्र बनाउन सक्यो। २८ रन बनाएकी विन्फ्रेड दुराईसिंगम मिड विकेटमा क्याच आउट भईन्।
अन्तिम ३ ओभरमा जित्न १८ रन आवस्यक हुँदा मलेसियासंग पाँच विकेट बाँकी थियो। अठारौं ओभरमा इन्दु बर्माले मात्र २ रन खर्चिन्। उन्नाईसौं ओभरमा कविता जोशीले गरेको ओभरमा पुनः मलेसियाले एक रन आउट सहित दुई विकेट गुमायो।अन्तिम ओभरमा जित्न १० रन आवस्यक रह्यो जुन अवस्थामा कविता कुँवरको ओभरमा मलेसियाले थप २ विकेट गुमाएर ४ रन मात्र बनाउन सक्यो।
नेपालको बलिंगमा कविता कुँवर ( ४-०-१०-२ ) र कविता जोशीले ( २-०-५-२ ) समान दुई विकेट हात पारिन् भने रुबिना क्षेत्री र अश्मिना कर्माचार्यले समान एक विकेट लिए।
टस हारेर ब्याटिंग गरेको नेपालले २० ओभरमा ६ विकेट गुमाएर ८४ रन बनाएको थियो।
नेपालको लागि सिता राना मगरले सर्वाधिक ३८ रन बनाईन् जुन क्रममा ५४ बलमा १ चौका प्रहार गरिन्। अप्सरी बेगमले १७ तथा रुबिना क्षेत्रीले १२ रन बनाईन्।
खराब सुरुवात गरेको नेपालले खाता नखोल्दै पहिलो ३ बलमा ३ विकेट गुमाएको थियो। त्यसपछि सिता राना मगरले अन्तिम सम्म ब्याटिंग गर्दै प्रतिस्पर्धात्मक योगफलसम्म नेपाललाई पुर्याईन्। छैठौं विकेटको लागि सिताले अप्सरीसंग ५१ रनको साझेदारी गरिन्। मलेसियाको बलिंगमा आइना हमिजाले २ विकेट लिईन्।
प्रतियोगिता अन्तर्गत नेपालले दोश्रो खेल शुक्रबार बहराईनसंग भोलि खेल्नेछ। सेलाङ्गोर टर्फ क्लब, क्वालालम्पुरमा हुने खेल नेपाली समय ११:१५ बजे सुरु हुनेछ।
यस प्रतियोगितामा ११ राष्ट्रको सहभागिता रहेको छ । सहभागी ११ देशलाई दुई समूहमा विभाजन गरिएको छ ।
प्रतियोगितामा समूह ए मा नेपाल, बहरान, भुटान, मलेसिया, कतार र युएई छन् । समूह बी मा चीन, हङकङ, थाईल्यान्ड, कुवेत र म्यानमार छन् । समुह चरणमा सबै टिमले एकअर्कासंग एक/एक खेल खेलेपछि दुवै समुहबाट शिर्ष दुई टिम सेमीफाइनल प्रवेश गर्नेछन्। फाइनल पुग्ने दुई टिमले आगामी वर्ष टि-२० विश्वकप ग्लोबल छनोट खेल्न पाउनेछ।