नेपाली राष्ट्रिय क्रिकेट टिमको क्यानडा भ्रमण अन्तर्गत खेलिएको दोश्रो अभ्यास खेलमा नेपालले एमएलसीसी-११ ओन्टारियोलाई पराजित गरेको छ।
नेपालले दिएको २१० रनको लक्ष पछ्याएको एमएलसीसीले १९.३ ओभरमा १५४ रन मात्र बनायो। एमएलसीसीको लागि बरुण सहदेवले ५० तथा नरेश बुढायरले ४१ रन योगदान दिए। नेपालको बलिंगमा सोमपाल कामिले २ तथा करन केसी, किशोर महतो, आदील आलमले समान १/१ विकेट लिए।
भ्रमण अन्तर्गत यस अघि खेलिएको एकदिवसीय खेलमा नेपालले एमएलसीसी-११ लाई ६९ रनले पराजित गरेको थियो।
यस अघि टस जितेर ब्याटिंग गरेको नेपालले निर्धारित २० ओभरमा ४ विकेट क्षतिमा २०९ रन बनायो।
नेपालको लागि पाँचौ नम्बरमा ब्याटिंग गरेका रोहित पौडेलले सर्वाधिक अविजित ७१ रन बनाए जुन क्रममा ३१ बलमा ५ चौका र ५ छक्का प्रहार गरे। दिपेन्द्र ऐरीले पनि अर्धशतक बनाउने क्रममा २७ बलमा ६ चौका र २ छक्का मद्दतले ५४ रन बनाए। ओपनर पवन सर्राफले ३७, देव खनालले २० तथा आदील आलमले अविजित १० रन बनाए।
क्यानडा भ्रमण अन्तर्गत नेपालले अब क्यानडासंग दुई वटा एकदिवसीय खेल्नेछ। पहिलो एकदिवसीय जुलाई 5 तथा दोश्रो एकदिवसीय जुलाई ६ तारिखमा खेलिनेछ।
क्यानडामा सिरिज खेलेर नेपाली टोली उतैबाट नेपाल, स्कटल्यान्ड र नामिबिया सम्मिलित आईसीसी विश्वकप लिग–२ त्रिदेशीय सिरिज खेल्न स्कटल्यान्ड जानेछ । स्कटल्यान्डमा नेपालले पहिलो खेल नामिबियाविरुद्ध जुलाई ११, दोस्रो खेल स्कटल्यान्डविरुद्ध जुलाई १३, तेस्रो खेल नामिबियाविरुद्ध जुलाई १६ र अन्तिम खेल स्कटल्यान्डविरुद्ध जुलाई १७ मा खेल्नेछ ।
लिग–२ नेपाली टोली
सन्दीप लामिछाने (कप्तान), रोहित पौडेल (उपकप्तान), कुशल भुर्तेल, आरिफ शेख, देव खनाल, दीपेन्द्रसिंह ऐरी, करण केसी, सोमपाल कामी, आदिल अन्सारी, वासिर अहमद, किशोर महतो, पवन सर्राफ र विनोद भण्डारी ।
