ब्याटिंग समस्या दोहोरिएपछि स्कटल्याण्डमा जारि त्रिकोणात्मक एकदिवसीय अन्तर्राष्ट्रिय सिरिजमा नेपाल नामिबियासंग ६३ रनले पराजित भएको छ। सिरिजको पहिलो खेलमा पनि नेपाल नामिबियासंग पराजित भएको थियो भने दोश्रो खेलमा स्कटल्याण्डलाई पराजित गरेको थियो।
हारपछि नेपाल विश्वकप लिग-२ अंकतालिकाको छैठौं स्थानमा झरेको छ। स्कटल्याण्ड नेपाललाई पछि पार्दै पाँचौ स्थानमा उक्लेको छ। नेपालको १९ खेलमा १७ अंक छ भने नामिबियाको १८ खेलमा १८ अंकछ।
खेलमा नामिबियाले दिएको २०० रनको लक्ष पछ्याएको नेपालले ३७.५ ओभरमा १३६ रनमा सबै विकेट गुमायो। नेपालको लागि दिपेन्द्र ऐरीले सर्वाधिक ३८, आसिफ शेखले ३४, आदील आलमले २० रन तथा पवन सर्राफले अविजित १० रन बनाए।
नेपालले कुनै पनि बेला ठूलो साझेदारी गर्न नसक्नु हारको कारण बन्यो। छैठौं विकेटको लागि दिपेन्द्र ऐरी र आदील आलमले गरेको ३६ रनको साझेदारीनै सर्वाधिक रह्यो। १३२ रनमा ६ विकेट गुमाएको अवस्थामा दिपेन्द्र ऐरी दुई रन लिन खोज्दा रन आउट भए पछि नेपालले थप ४ रन जोड्दा सम्पूर्ण विकेट गुमायो।
नामिबियाका देब्रे हाते स्पिनर बर्नार्ड स्कोल्ज एक्लैले ५ विकेट लिए। जान फ्राईलिंकले ३ तथा गेरहार्ड इरास्मसले १ विकेट लिए।
यस अघि टस जितेर ब्याटिंग गरेको नामिबियाले ४९.२ ओभरमा सबै विकेट गुमाएर १९९ रन बनायो। उसको लागि कप्तान गेरहार्ड इरास्मसले सर्वाधिक ५३ रन बनाए। डेभिड विजाले ३४, जान निकोल र रुबेन ट्रंपलम्यानले समान १९ रन बनाए।
राम्रो सुरुवात गरेको नेपालले पहिलो पावरप्लेमा नामिबियाको ३ विकेट लियो। ३६/३ को अवस्थाबाट कप्तान इरास्मसलेले एक किनार सम्हालेर ब्याटिंग गरे। चौंथो विकेटको लागि उनले जान निकोलसंग ६९ रन जोडे। त्यसपछि कप्तान सन्दिप लामिछानेले इटन, जान फ्राईलिंक र इरास्मसको विकेट लिंदै नेपाललाई खेलमा हावी गराए। ११२ रनमा ६ विकेट गुमाएको अवस्थाबाट डेभिड विजाले जेजे स्मित, ट्रंपल म्यानसंग साझेदारी गर्दै योगफल अघि बढाए। दिपेन्द्र ऐरीले अन्तिममा २ विकेट लिंदै नामिबियाको इनिंग्स समाप्त पारे।
नेपालको बलिंगमा कप्तान सन्दिप लामिछानेले सर्वाधिक ४ विकेट लिए जुन क्रममा १० ओभरमा २ मेडन ओभर गर्दै ३९ रन खर्चिए। सोमपाल कामि र दिपेन्द्र ऐरीले २/२ तथा बसिर एहमदले १ विकेट लिए।
सिरिजको अन्तिम खेल नेपालले आयोजक स्कटल्याण्डसंग आइतबार खेल्नेछ।
