सिंगापुरसंग ८२ रनको विशाल अन्तरले पराजित हुँदा नेपालको टि-२० विश्वकप २०२० को यात्रा समाप्त भएको छ। सिंगापुर पहिलो पटक टि-२० विश्वकप छनौट खेल्न छानिएको छ।
आईसीसी टि-२० विश्वकप छनौट ( एसिया ) फाइनल अन्तर्गत नेपाल र सिंगापुर बीच अन्तिम खेलको विजेता आगामी अक्टोबरमा युएईमा आयोजना हुने टि-२० विश्वकप ग्लोबल छनौट खेल्ने थियो। तर नेपालले सिंगापुरले दिएको १९२ रनको विशाल लक्ष्य पछ्याउदा कमजोर ब्याटिंग गर्दै १५ ओभरमा १०९ रनमै सम्पूर्ण विकेट गुमाएपछि नेपालको सपना चकनाचुर हुन पुग्यो।
८२ रनको हार टि-२० अन्तर्राष्ट्रियमा नेपालको दोश्रो ठुलो रन अन्तरको हार हो। यस अघि नेपाल नेदरल्याण्डसंग २०१५ मा १०३ रनले पराजित भएको थियो।
सन् २०१४ मा हंगकंगमा सम्पन्न टि-२० विश्वकप पहिलो पटक खेलेको नेपाली टिमले त्यसपछि २०१६ टि-२० विश्वकपमा पनि छनौट हुन असफल रहेको थियो। लगातार दोश्रो पटक नेपाली टिम टि-२० विश्वकप छनौट हुन असफल रहेको छ।
प्रतियोगितामा नेपालले पहिलो खेलमा कतारसंग ४ विकेटको हार बेहोरेको थियो। जसपछि मलेसिया र कुवेतलाई पराजित गर्दा अन्तिम खेल जिते आगामी चरण छनौट हुने समीकरण थियो।
प्रतियोगिताको सम्पूर्ण खेलहरु सकिदा सिंगापुरको ४ खेलमा ३ जित र १ बराबरी अंक सहित ७ अंक रह्यो। कतार ४ अंक सहित दोश्रो र नेपाल ४ अंक भए पनि नेट रन रेटमा कतारसंग पछि पर्दै तेश्रो स्थानमा रह्यो।
नेपालको कमजोर ब्याटिंग, तासको पत्ता झैँ ढल्यो नेपालीको इनिंग
लक्ष्य पछ्याउने क्रममा नेपालले आक्रामक सुरुवात गर्यो। तर चौथो ओभरमा पारस खड्का १२ रन बनाएर आउट भए पछि भने नेपालले लगातार विकेट गुमाउन पुग्यो। पारसले १० बलमा १ चौका र १ छक्का प्रहार गरे।
त्यसपछि ज्ञानेन्द्र मल्ल २१ बलमा ४ चौका र ३ छक्का मदतले सातौँ ओभरमा ३९ रन बनाएर आउट भए। त्यसपछि शरद ७, रोहित पौडेल, ५, बिनोद भण्डारी ९ तथा करन केसी खाता नखोली आउट भए। त्यसपछि सोमपाल कामि र दिपेन्द्र ऐरीले साझेदारी बनाउने संकेत देखाए पनि सोमपाल १३ औं ओभरमा १० रन बनाएर रन आउट हुन पुगे। लगत्तै सन्दिप पनि खाता नखोल्दै आउट भए।
एक किनार सम्हालीरहेका दिपेन्द्र ऐरी २२ बलमा १ चौका र १ छक्का बनाएर नवौं विकेटको रुपमा १५ औं ओभरमा आउट भए। सोहि ओभरमा अविनाश बोहरा पनि खाता नखोली आउट हुँदा नेपाल अल-आउट हुन् पुग्यो।
सिंगापुर बलर भिजयकुमारले सर्वाधिक ४ विकेट लिए। यस्तै बस्करनले २ तथा जनक प्रकास, अमजद महबुब र ए कृष्णले १/१ विकेट लिए।
सिंगापुरको कीर्तिमानी योगफल , बसन्त इतिहासकै महँगो
खेलमा टस जितेर सिंगापुरले पहिले ब्याटिंग गर्दै २० ओभरमा ६ विकेट गुमाएर १९१ रनको योगफल तयार गर्दै नेपाललाई १९२ रनको लक्ष्य दिएको छ।
टि-२० अन्तर्राष्ट्रियमा कुनै पनि टिमले नेपाल बिरुद्ध बनाएको यो सबैभन्दा ठुलो योगफल हो। यस अघि नेदरल्याण्डले गत वर्ष १७४ रन बनाएको थियो। त्यो खेल वर्षाले पुरा हुन पाएको थिएन जुन क्रममा १६.४ ओभरमा नेदरल्याण्डले उक्त योगफल तयार गरेको थियो।
ओपनर सुरेन्द्रन चन्द्रमोहनलाई दोश्रो ओभरमा करन केसीले आउट गरेपछि दोश्रो विकेटको लागि सिंगापुर ब्याट्सम्यान रोहन रंगराजन र टिम डेभिडले दोश्रो विकेटको लागि ८९ रनको ठुलो साझेदारी गरे।
११ औं ओभरमा अविनाश बोहराले रंगराजनलाई क्क्याच आउट गर्दै दोश्रो विकेट दिलाए। उनले ४९ रन बनाउन ३३ बलमा ४ छक्का र ३ चौका प्रहार गरे। त्यस पछि पनि डेभिडले एक किनार सम्हालीरहे जसलाई मनप्रित सिंहले साथ दिए। दुवैले तेश्रो विकेटको लागि ६६ रनको साझेदारी गरे।
अविनाश बोहराले ७७ रन बनाएका डेभिडलाई अठारौं ओभरमा क्याच आउट गर्दै नेपाललाई राहत दिलाए। उनले ४३ बलमा ८ चौका र ३ छक्का प्रहार गरे। त्यसै ओभरमा बोहराले खाता नखोल्दै चेतन सूर्यवंशीलिई पनि आफ्नै बलमा आफैले क्याच आउट गरे।
त्यस पछि ४२ रन बनाएका मनप्रितलाई करन केसीले क्याच आउट गरे। २७ बलमा उनले ३ चौका र २ छक्का प्रहार गरे। इनिंगको अन्तिम ओभरमा अविनाश बोहराले मात्र ६ रन खर्चेर १ विकेट लिए।
नेपालको बलिंगमा अविनाश बोहराले सर्वाधिक ४ विकेट लिए जुन क्रममा ४ ओभरमा ३५ रन खर्चिए। नेपालको लागि टि-२० अन्तर्राष्ट्रियमा यो दोश्रो उत्कृस्ट बलिंग फिगर हो। बसन्त रेग्मीले टि-२० विश्वकप २०१४ मा हंगकंग बिरुद्ध ४ विकेट लिंदा ४ ओभरमा १६ रन मात्र खर्चिएका थिए जुन उत्कृस्ट बलिंग फिगर हो।
करन केसीले २ ( ३-०-२६-२ ) विकेट लिए भने सोमपाल कामि ( ३-०-१५-० ) , सन्दिप लामिछाने ( ३-०-३४-० ) , बसन्त रेग्मी ( ४-०-५४-० ) र शरद भेसावकर ( ३-०-२५-० ) विकेट विहिन रहे।
बसन्तले दिएको ५४ रन टि-२० अन्तर्राष्ट्रियमा नेपाली बलरले दिएको अहिलेसम्मकै सर्वाधिक रन हो। यस अघि सोमपाल कामिले नेदरल्याण्ड बिरुद्ध गत वर्ष ४ ओभरमा ४३ रन खर्चेर १ विकेट लिएका थिए।
सिंगापुरले यस अघि नेपाललाईकुनै पनि सिनियर स्तरको क्रिकेटमा पराजित गर्न सकेको थिएन।
