आईसीसी बिश्वकप छनौट प्रतियोगिता अन्तर्गत सातौँ स्थानको लागि नेपाल र नेदरल्याण्ड प्लेअफ खेलीरहेका छन्। टस जितेर ब्याटिंग गरेको नेदरल्याण्डले खराब सुरुवात गरेको छ।
सोमपाल कामिले सुरुवाती २ विकेट लिएपछि नेदरल्याण्डले १० ओभरमा ३७ रन बनाएर २ विकेट गुमाईसकेको छ। कप्तान पिटर बोरेन ७ रन तथा ओ डोड २४ रन बनाएर ब्याटिंग गरिरहेका छन्।
नेदरल्याण्डले सोमपालले ओपनर वेसले बारेसीला र बेन कुपरलाई खाता नखोल्दै पेभेलियन पठाएका हुन्। २ विकेट लिएसंगै सोमपाल लिस्ट ए क्रिकेटमा ५० विकेट लिने पहिलो नेपाली बलर समेत बनेका छन्।
प्रतियोगिताको अन्तिम खेलमा नेपालले पहिलो पटक भेट्रान स्पिनर शक्ति गौचनलाई खेलाएको छ भने बसन्त रेग्मीलाई आराम दिईएको छ। शरद भेसावकर घाइते भएका कारण आजको खेल पनि गुमाउन पुगे भने ललित भण्डारी र दिलिप नाथ अन्तिम खेलमा पनि बाहिर छन्।
नेपालको अन्तिम ११ – पारस खड्का, ज्ञानेन्द्र मल्ल, अनिल साह, दिपेन्द्र ऐरी, आरिफ शेख, रोहित पौडेल, सोमपाल कामि, शक्ति गौचन करन केसी, सन्दिप लामिछाने र ललित राजबंशी
एकदिवसीय मान्यता प्राप्त भए पनि नेपाल र नेदरल्याण्ड बीचको खेल लिस्ट ‘ए’ नै हुनेछ। नेपाल र नेदरल्याण्ड पाएको मान्यता प्रतियोगिता पछि मात्रै लागु हुनेछ।
