नोभेम्बर २२ तारिख देखि युएईमा सुरु हुने टि-२० विश्वकप एसिया छनोट प्रतियोगिताको तयारी स्वरूप कतार भ्रमणमा रहेको नेपाली महिला राष्ट्रिय क्रिकेट टिमले आयोजक कतारसंग तिन खेलको टि-२० अन्तर्राष्ट्रिय सिरिज अन्तर्गत दोश्रो खेल आज बुधबार खेल्दैछ।
खेल नेपाली समय ३:४५ बजे दिउसो कतारको दोहा स्थित वेस्ट इन्ड पार्क इन्टरनेसनल क्रिकेट स्टेडियममा खेलिनेछ।
आजको खेलमा नेपाल विजयी भए नेपाली महिला क्रिकेट टिमले जितेको पहिलो टि-२० अन्तर्राष्ट्रिय सिरिज हुनेछ। नेपालले हालसम्म कुनै पनि टि-२० अन्तर्राष्ट्रिय प्रतियोगिता या सिरिज जितेको इतिहास छैन।
पहिलो खेलमा नेपालले आयोजक कतारलाई ११९ रनको रेकर्ड अन्तरले पराजित गरेको थियो। उक्त जित नेपालको टि-ट्वान्टी अन्तर्राष्ट्रिय इतिहासकै विशाल रन अन्तरको जित हो।
मंगलबार सम्पन्न खेलमा नेपालले दिएको १४७ रनको लक्ष्य पछ्याएको कतारले २७ रन मात्र बनाएको थियो। नेपालको लागि ब्याटिंगतर्फ इतिहासकै पहिलो टि-२० अन्तर्राष्ट्रिय अर्धशतक बनाउने क्रममा इन्दु बर्माले ५५ रन तथा सिता राना मगरले ३९ र सरिता मगरले २१ रन बनाईन्। बलिंगमा कप्तान रुबिना क्षेत्रीले ३ तथा कविता कुँवर र सिता राना मगरले समान २ विकेट हात पारे।
