- विकेटनेपाल, माघ-१८ , शुक्रबार
नेपाल र युएई बीच जारी ३ वटा टि-२० अन्तर्राष्ट्रियको सिरिज अन्तर्गत दोश्रो टि-२० आज खेलीदै छ।
पहिलो टि-२० मा नेपाल २१ रनले पराजित भएको थियो जुन क्रममा युएईले दिएको १५४ रनको लक्ष्य पछ्याउने क्रममा नेपालले १३२ रन मात्रै बनाउन सकेको थियो।
एकदिवसीय अन्तर्राष्ट्रिय सिरिज २-१ ले जितेको नेपालले टी-२० सिरिज जित्ने सम्भावना कायम राख्न आज जित हात पार्ने पर्ने दबाब रहेको छ। नेपालले हाल सम्म कुनै पनि टि-२० अन्तर्राष्ट्रिय सिरिज जितेको इतिहास छैन त्यसैले दोश्रो खेल जित्दै नेपाल निर्णायक तेश्रो टि-२० खेल्न चाहन्छ।
खेल नेपाली समय अनुसार २:४५ बजे आईसीसी ग्लोबल क्रिकेट एकेडेमीमा सुरु हुनेछ। खेलको Youtube मा Dubai Sports City च्यानलले प्रत्यक्ष प्रशारण गरिरहेको छ।
पहिलो टि-२० मा नेपालको हारको कारण माथिल्लो क्रमका ब्याट्सम्यानले रन बनाउन नसक्नु थियो। ओपनिङ्गमा आएका प्रदिप ऐरि खाता नखोल्दै आउट भएका थिए भने ज्ञानेन्द्र मल्लले ठुलो इनिंग खेल्न सकीरहेका छैनन्। यस्तै दिपेन्द्र ऐरि लगातार फ्लप सावित हुनु ठुलो चिन्ताको बिषय बनेको छ। ऐरिले युएई टुरमा हालसम्म १० भन्दा माथिको रन पनि बनाउन सकेका छैनन्।
पहिलो टि-२० मा सोमपाल कामिले राम्रो बलिङ्ग गरे पनि करन केसी र अविनाश बोहरा महँगो सावित भएका थिए। करनले ४ ओभरमा ४३ रन खर्चेर विकेट बिहिन रहेका थिए भने अविनाशले १ विकेट हात पार्दा ४ ओभरमा ३६ रन दिएका थिए। स्पिनरहरुको प्रदर्शन भने राम्रो रहेको थियो।
हिजो डेब्यु गरेका सन्दिप जोराको फर्म नेपालको लागि सुखद पक्ष हो भने माथिल्लो क्रमको ब्याट्सम्यानले राम्रो प्रदर्शन गरे नेपालले युएईलाई पराजित गर्न सक्छ। सुरुवाती विकेट लिए पनि युएईको मध्यक्रमलाई रोक्न सके नेपालले सफलता पाउन सक्छ।
