त्रिकोणात्मक ट्वान्टी २० शृंखला अन्तर्गतको फाइनल खेलमा हाल घरेलु टोलि नेपाल र पपुवा न्यु गिनी फाइनल खेलमा उपाधिको लागि प्रतिस्पर्धा गरिरहेका छन् ।
कीर्तिपुरस्थित त्रिवि क्रिकेट मैदानमा जारि खेलमा टस हारेर पहिले ब्याटिंगको निम्तो पाएको नेपालले निर्धारित २० ओभरमा ६ विकेट गुमाउँदै १६८ रन बनाएको छ ।
नेपालको ब्याटिंगतर्फ दीपेन्द्रसिंह ऐरीले ३८ बलमा ५ चौकाको मद्धतमा सर्वाधिक ५४ रन बनाए । यस्तै, करण केसीले १२ बलमा ५ चौका र १ छक्काको मद्धतमा अविजित ३३, ओपनरद्वय कुशल भुर्तेल र आशिफ शेखले क्रमशः २५ र २९ तथा मोहम्मद आदील आलमले १५ रन बनाए भने अन्य ब्याटरले दोहोरो अंकमा रण बनाउन सकेनन् ।
ओपनर कुशल भुर्तेल र आशिफ शेखले पहिलो विकेटको लागि ३७ रनको साझेदारी गरे । पाचौं ओभरमा भुर्तेललाई काबुवा मोरेले लिगा सियाकाबाट क्याच आउट गराए । लगत्तै ओभरमा रोहित पौडेललाई पनि रिले हेकुरेले आउट पारेपछि आसिफले तेस्रो विकेटको लागि दीपेन्द्रसिंह ऐरीसँग ३८ रनको साझेदारी गर्दै नेपालको इनिंग्स सम्हाले ।
१२ औं ओभरमा सेमो कामियाले ३ विकेटसहित मेडन ओभर गर्दै नेपाललाई दबाबमा ल्याए । उनले दाजुभाई आशिफ र आरिफ तथा दिलिप नाथलाई आउट बनाएका थिए । मोहम्मद आदील आलमलाई पनि चाड सोपरले पेभेलियन फर्काए । त्यसपछि दीपेन्द्रले करण केसीसँग अविजित ५४ रनको साझेदारी गर्दै नेपाललाई चुनौतिपूर्ण योगफलतर्फ डोर्याए ।
पपुवा न्यु गिनीको बलिंगतर्फ सेमो कामियाले ४ ओभरमा १ मेडनसहित २८ रन खर्चिएर सर्वाधिक ३ विकेट लिए । चाड सोपर, काबुवा मोरिया र रिले हेकुरेले समान १ विकेट लिए ।
