- विकेटनेपाल – ७ फाल्गुन, सोमबार
नामिबियामा केहि दिन अघि सम्पन्न आइसीसी विश्व क्रिकेट लिग डिभिजन-२ मा उत्कृस्ट प्रदर्शन गर्दै एक दिवसीय विश्वकप छनौटमा स्थान बनाएको नेपाली क्रिकेट टोलिलाई नेपाल सरकारले सम्मान गर्ने भएको छ।
सोमबार प्रधानमन्त्री निवास बालुवाटारमा एक कार्यक्रमका बिच प्रधानमन्त्री केपी शर्मा ओलीले डिभिजन-२ मा दोस्रो स्थान हाँसिल गर्दै विश्वकप छनौटमा स्थान बनाएको नेपाली टोलिका सदस्य खेलाडी र प्रशिक्षकलाई बधाई तथा शुभकामना व्यक्त गरेका हुन्। प्रधानमन्त्री ओलीले खेलाडी र प्रशिक्षकलाई हौसला वृद्धिका लागि पुरस्कार स्वरूप जनही ३-३ लाख प्रदान गर्ने घोषणा समेत गरेका छन्।
यता मदन भण्डारी स्पोर्ट्स एकेडेमीले पनि सरकारले दिने पुरस्कारमा १-१ लाख रुपैयाँ थप गर्ने घोषणा गरेको छ। एकेडेमीका बिनोद श्रेष्ठले सरकारले दिने पुरस्कार राशिमा एकेडेमीले प्रति खेलाडी रु १ लाखका दरले थप गर्ने घोषणा गरेका हुन्।
नेपाल आउँदो मार्च ४ देखि २५ सम्म जिम्बावेमा हुने २०१९ एकदिवसीय बिश्वकप छनौट प्रतियोगितामा सहभागी हुँदै छ। नामिबियामा सम्पन्न डिभिजन-२ को फाईनलमा युएईसंग ७ रनले पराजित हुँदै उपविजेता उपविजेता बनेको नेपाल छनौट प्रतियोगिताको समूह “बि” मा परेको छ। आईसीसी बिश्वकप छनौटबाट उत्कृस्ट हुने २ टिम २०१९ मा इंग्ल्यान्डमा आयोजना हुने एकदिवसीय बिश्व कप खेल्न छनौट हुनेछ। आईसीसीले प्रतियोगितामा उत्कृस्ट ३ हुने एसोसिएट सदस्यले सन् २०२२ सम्मको लागि एकदिवसीय रास्ट्रको मान्यता पाउने बताएको छ।
