नेपाली राइनोज क्रिकेट क्लबले टु-एक्स क्रिकेट युएसए कपको उपाधि जितेको छ ।
मुसा क्रिकेट स्टेडीयममा सम्पन्न फाइनल खेलमा हस्टन स्पार्क्सलाई ५४ रनको भारी अन्तरले पराजित गर्दै राइनोजले उपाधि सहित ६० हजार अमेरिकी डलर र २० हजार डलर बराबरको मित्सुबासि कार आफ्नो बनायो । स्कोरकार्ड
टस हारेर पहिले ब्याटिंग गरेको राइनोजले पहिलो १० ओभरमा ७३/३ को स्कोर बनायो । त्यसपछि हस्टनले आफ्नो १० ओभरमा ७४/४ को स्कोर गर्दै १ रनको अग्रता लियो । त्यसपछि ब्याटिंग गर्न आएको राइनोजले बाँकी १० ओभरमा १२४ रन बनाउदै २० ओभरमा १९७/६ को स्कोर खडा गर्दै बाँकी १० ओभरमा हस्टनलाई जितको लागि १२४ रनको लक्ष पस्कियो । १२४ रन लक्ष पछ्याएको हस्टनले ५३ रनले पछि पर्दै सबै विकेट गुमायो र ५४ रनले नेपाललाई जित सुम्पियो ।
नेपालको लागि कप्तान पारस खड्काले आक्रामक ब्याटिंग गर्दै सर्बाधिक ७७ रन योगदान दिए । यस्तै आक्रामक ब्याटिंग गर्दै शन फिंडलेले अविजित ६१ रन बनाए भने ओपनर सुबास खकुरेलले ३२ रन योगदान दिए । हस्टन बलर असद अलिले ३ विकेट आफ्नो नाम गरे ।
हस्टनको लागि शाहजैब हसनले सर्बाधिक ४६ तथा टिमरोय एलेनले ४५ रन योगदान दिए । पाकिस्तान रास्ट्रिय क्रिकेटर समेत रहेका कामरान अकमलले १९ रन बनाए । बलिंग तर्फ नेपालको लागि शन फिंडलेले ३ विकेट लिए भने रस्टि थेरोन, सोमपाल कामि र पारस खड्काले २/२ विकेट हात पारे ।
फाइनल खेलको म्यान अफ द म्याच शन फिंडले घोषित भए । प्रतियोगिताको उत्कृस्ट बलर हस्टन स्पार्क्सका असद अलि भए भने उत्कृष्ट ब्याट्सम्यान युएई फाल्कोन्सका जिसान मक्सुद घोषित भए ।
नेपालले सेमीफाइनल खेलमा फ्लोरिडा अन्डरडगलाई पराजित गरेको थियो ।
