वेस्टइन्डिज र अमेरिकाले संयुक्त रुपमा आयोजना गर्ने २०२४ टि-ट्वान्टी विश्वकपको खेल तालिका अन्तर्राष्ट्रिय क्रिकेट काउन्सिलले सार्वजनिक गरेको छ।
गत वर्ष नोभेम्बरमा नेपालमा आयोजित टि-ट्वान्टी विश्वकप एसिया छनोटको उपविजेताको रुपमा नेपाल दोश्रो पटक टि-ट्वान्टी विश्वकप खेल्न छनोट भएको थियो। २०१४ मा बंगलादेशमा आयोजित टि-ट्वान्टी विश्वकपमा नेपाल पहिलो पटक छनोट भएको थियो।
जुन १ देखि २९ तारिखसम्म आयोजना हुने प्रतियोगितामा पहिलो पटक २० वटा टिम सहभागी हुँदैछन्।
प्रतियोगितामा नेपाल समुह ‘डी’ मा परेको छ जुन समुहमा बंगलादेश, दक्षिण अफ्रीका, श्रीलंका र नेदरल्याण्ड छन्।
खेल तालिका अनुसार नेपालले पहिलो खेल जुन ४ तारिखमा नेदरल्याण्डसंग अमेरिकाको डालसमा, दोश्रो खेल श्रीलंकासंग जुन ११ मा अमेरिकाको लौडरहिलमा, तेश्रो खेल जुन १४ मा दक्षिण अफ्रीकासंग वेस्टइन्डिजको सेन्ट भिन्सेन्ट एण्ड द ग्रेनाडाईन्समा तथा चौंथो खेल सोहि स्थानमा जुन १६ तारिखमा बंगलादेशसंग खेल्ने तालिका छ।
२० टिमलाई ४ वटा समुहमा बिभाजन गरिएको छ
समुह ‘ए’ : भारत, पाकिस्तान, आयरल्याण्ड, क्यानडा र अमेरिका
समुह ‘बि’ : इंग्ल्यान्ड, अस्ट्रेलिया, नामिबिया, स्कटल्याण्ड र ओमान
समुह ‘सी’ : न्युजिल्यान्ड, वेस्ट इन्डिज, अफगानिस्तान, युगान्डा र पपुवा न्यु गिनी
समुह ‘डी’ : नेपाल, दक्षिण अफ्रीका, श्रीलंका, बंगलादेश, नेदरल्याण्ड
४ वटा समुहमा सबै टिमले एक अर्कासंग १/१ खेल खेलीसकेपछि प्रत्येक समुहबाट शिर्ष २ टिम सुपर-८ चरण प्रवेश गर्नेछ।
