- विकेटनेपाल – ३ मङ्सिर, सोमबार
धनगढीमा जारी तेस्रो निष्ट लिटिल फ्लावर प्रिमियर लिगको उपाधिका लागि लिटिल फ्लावर धनगढी र लिटिल बुद्ध महेन्द्रनगर भिड्ने भएका छन्। सोमबार सम्पन्न सेमिफाइनल खेलहरु जित्दै दुबै टोलिले फाइनलमा स्थान बनाएका हुन्।
सोमबार सम्पन्न पहिलो सेमिफाइनलमा लिटिल फ्लावरले साबिक बिजेता सिद्धार्थ सिसु सदनलाई ५ विकेटले पराजित गर्यो। यस्तै दिनको दोस्रो खेलमा हिमालयन वाईट हाउसलाई १३ रनले हराउंदै लिटिल बुद्धले फाइनलमा लिटिल फ्लावरसंगको भेट पक्का गरेको हो।
सुरज तिरुवोले उत्कृस्ट प्रदर्शन गर्दा लिटिल फ्लावरले पहिलो सेमिफाइनलमा सिदार्थ शिशु सदनमाथि ५ विकेटको जित दर्ता गर्यो। टस जितेर पहिला ब्याटिङ गरेको डिफेन्डिङ च्याम्पियन सिद्धार्थ शिशु सिद्धार्थले २० ओभरमा ८ विकेट गुमाउँदै १०२ रनको योगफल तयार गरेको थियो।
सिद्धार्थले दिएको १०३ रनको लक्ष्य लिटिल फ्लावर स्कुल धनगढीले १७.२ ओभरमा ५ विकेट गुमाउँदै पुरा गर्यो। खेलको म्यान अफ दि म्याच लिटिल फ्लावरका सुरज तिरुवो घोषित भए।
यस्तै सोमबारनै सम्पन्न दोस्रो सेमिफाइनलमा लिटिल बुद्धले काठमाडौंको हिमालयन वाईट हाउसलाई १३ रनले पछि पार्यो। टस जितेर पहिले ब्याटिङ गरेको लिटिल बुद्ध एकेडेमी महेन्द्रनगरले १९.१ ओभरमा सबै विकेट गुमाउँदै १५० रनको योगफल तयार गरेको थियो।
जवाफमा १५१ रनको लक्ष्य पछ्याएको हिमालयन ह्वाईट हाउसले निर्धारित २० ओभरमा ७ विकेट गुमाएर १३७ रन मात्र जोड्न सकेपछि खेल १३ रनले गुमाउन पुग्यो। लिटिल बुद्धका नारायण जोशी खेलको म्यान अफ द म्याच भए।
प्रतियोगिताको फाइनल खेल मङ्सिर ४ गते (मंगलवार) खेलिनेछ।
प्रतियोगिताको विजेताले १ लाख ११ हजार १ सय ११ प्राप्त गर्नेछ। उपविजेताले ५५ हजार ५ सय ५५ नगदका साथै ट्रफी पाउने छन्। प्रतियोगिताको उत्कृष्ट खेलाडीले नगद १० हजार, उत्कृष्ट व्याट्सम्यान, उत्कृष्ट वलर र उदयमान खेलाडीलाई नगद ५ हजार सहित ट्रफी प्रदान गरिने प्रतियोगिताका निर्देशक कलेन्द्र शाहीले बताए। प्रत्येक खेलको म्यान अफ द म्याच अन्तर्गत लिग चरणमा प्रति खेल नगद एक हजार, नकआउट चरणमा प्रति खेल नगद एक हजार ५ सय र फाईनलमा नगद २ हजार ट्रफी र प्रमाणपत्र पुरस्कार दिईने उनले बताए।
