जित्नै पर्ने खेलमा अफगानिस्तानलाई ८ विकेटले पराजित गर्दै न्युजिल्यान्ड टि-ट्वान्टी विश्वकप २०२१ को सेमीफाइनल पुग्ने चौंथो टिम बनेको छ। शेख जायद स्टेडियम, अबुधाबीमा अफगानिस्तानले दिएको १२५ रनको लक्ष्य न्युजिल्यान्डले मात्र २ विकेट क्षेतीमा १८.१ ओभरमै भेटायो।
न्युजिल्यान्डको जितसंगै अफगानिस्तान तथा एक खेल खेल्न बाँकी रहेको भारत सेमीफाइनल पुग्ने सम्भावना समाप्त भएको छ। यस अघि समुह ‘१’ बाट इंग्ल्यान्ड र अस्ट्रेलिया तथा समुह ‘२’ बाट पाकिस्तान सेमीफाइनल प्रवेश गरिसकेको छ। आजै हुने दोश्रो खेलमा पाकिस्तान र स्कटल्याण्ड बीचको खेलपछि सेमीफाइनलमा प्रतिस्पर्धा गर्ने टिमको टुंगो लाग्नेछ।
लक्ष्य पछ्याउने क्रममा न्युजिल्यान्डको ब्याटिंगमा कप्तान केन विलियमसनले सर्वाधिक ४० रन बनाए जुन क्रममा ४२ बलमा ३ चौका प्रहार गरे। डेभोन कनवेले अविजित ३६ रन बनाए जुन क्रममा ३१ बलमा ४ चौका प्रहार गरे। मार्टिन गप्टिलले २८ तथा डेरेल मिचेलले १७ रन बनाए। ५७ रनमा २ विकेट गुमाएको अवस्थामा विलियमसन र कनवेले अविजित ६८ रनको साझेदारी गरे। अफगानिस्तान बलर मुजिब उर् रहमान ( ४-०-३१-१ ) र राशिद खान ( ४-०-२७-१ ) ले समान एक विकेट लिए।
टस जितेर ब्याटिंग गरेको अफगानिस्तानले २० ओभरमा ८ विकेट क्षेतीमा १२४ रन बनाएको थियो।उसको लागि नजिबुल्लाह जद्रानले सर्वाधिक ७३ रन बनाए जुन क्रममा ४८ बलमा ६ चौका र ३ छक्का प्रहार गरे। जद्रानको स्कोर टि-२० विश्वकपमा अफगानिस्तान ब्याट्सम्यानको सर्वाधिक स्कोर हो। गुल्बदिन नैबले १५ तथा कप्तान मोहम्मद नाबीले १४ रन बनाए। १९ रनमा ३ विकेट गुमाएको अवस्थामा जद्रानले नैबसंग ३७ तथा नाबीसंग ५९ रनको साझेदारी गरे।
न्युजिल्यान्ड बलर ट्रेन्ट बोल्टले ३ विकेट ( ४-०-१७-३ ) तथा टिम साउदीले २ विकेट ( ४-०-२४-२ ) लिए। जेम्स निशम ( ४-०-२४-१ ), एडम मिल्ने ( ४-०-१७-१ ) र इश सोढीले ( २-०-१३-१ ) समान एक विकेट लिए।
