प्रदेश-२ लाई ९ विकेटले सहजै पराजित गर्दै लुम्बिनी प्रदेश यु-१९ राष्ट्रिय प्रतियोगिताको फाइनल पुग्ने पहिलो टिम बनेको छ। टियु अन्तर्राष्ट्रिय क्रिकेट मैदान कीर्तिपुरमा प्रदेश-२ ले दिएको १६९ रनको लक्ष्य लुम्बिनी प्रदेश-२ ले १ विकेट क्षेतीमा २६.५ ओभरमा भेटायो।
लुम्बिनीको जितमा देव खनालले सर्वाधिक ५६ रन बनाए जुन क्रममा ६ चौका र २ छक्का प्रहार गरे। यस्तै आकाश त्रिपाठीले ५७ रन बनाए जुन क्रममा ६२ बलमा ९ चौका प्रहार गरे। आकाश त्रिपाठी र देव खनालले १४१ रनको ओपनिंग साझेदारी गर्दै लुम्बिनीको जितको आधार तयार गरे जुन प्रतियोगिताकै सर्वाधिक ओपनिङ्ग साझेदारी समेत हो।
यस अघि टस हारेर ब्याटिंग गरेको प्रदेश-२ ले ३९.५ ओभरमा १६८ रन बनाएको थियो। प्रदेश-२ को ब्याटिंगमा ओपनर सन्तोष कार्कीले सर्वाधिक ८२ रन बनाए जुन क्रममा ९२ बलमा ७ चौका र ५ छक्का प्रहार गरे। यस्तै गुल्सन झाले २३ बलमा ३ चौका र २ छक्का मद्दतले ३२ तथा आदील अन्सारीले २४ बलमा ३ चौका र १ छक्का मद्दतले अविजित २२ रन बनाए।
एक समय १४१ रनमा मात्र ३ विकेट गुमाएको प्रदेश-२ ले २८ औं ओभरमा सन्तोष कार्कीको विकेट गुमाएपछि लगातार विकेट गुमायो। फलस्वरुप १४१ बाट थप २७ रन जोड्दा उसले सम्पूर्ण विकेट गुमायो।
लुम्बिनी प्रदेशको बलिंगमा देब्रे हाते स्पिनर बसिर एहमदले सर्वाधिक ५ विकेट लिए जुन क्रममा ७.५ ओभरमा ३ मेडन ओभर गर्दै २४ रन खर्चिए। बिशाल बिक्रम केसीले ३ ( १०-२-४०-३ ) र राहुल चौधरीले २ विकेट ( १०-२-४३-२ ) लिए।
लिग चरणको सबै ६ खेल खेल्दा लुम्बिनीले ५ जित र १ हार पछि १० अंक बटुल्दै शिर्ष स्थानमा छ। हार पछि प्रदेश-२ को भने फाइनल पुग्ने सम्भावना गणितीय मात्र बाँकी छ। बाँकी खेलमा सुदूरपश्चिम र प्रदेश-१ पराजित हुँदै अन्तिम खेलमा प्रदेश-२ ले विशाल जित दर्ता गरेको खण्डमा मात्र प्रदेश-२ को सम्भावना छ।
