विभागीय टोली त्रिभुवन आर्मीले पीएम कप एकदिवसीय पुरुष क्रिकेट प्रतियोगितामा सहज जित निकालेको छ ।
मुलपानी क्रिकेट मैदानमा आइतबार आर्मीले गण्डकी प्रदेशलाई ६९ रनले हराएको हो । आर्मीले दिएको १ सय ६६ रनको लक्ष्य पछ्याएको गण्डकीले ३२ ओभर २ बलमा अलआउट हुँदै ९६ रनमा समेटियो ।
गण्डकीका लागि समिर कँडेलले सर्वाधिक ३९ रन बनाए । कप्तान विपिन खत्री १९ र अर्जुन कुमालले १४ रन बनाए ।
यता आर्मीको सहज जितमा सुसन भारीले सर्वाधिक ५ विकेट लिए । जारी प्रतियोगिताकै उत्कृस्ट स्पेल दर्ता गर्ने क्रममा देब्रे हाते स्पिनरले नौं ओभरमा १४ रन खर्चेर २ मेडनसहित ५ विकेट लिएका हुन् । यस्तै कुशल मल्ल र साहब आलमले समान २र२ विकेट लिए भने विक्रम सोबको नाममा एक विकेट रह्यो ।
त्यसअघि पहिले ब्याटिङ गरेको आर्मीको लागि कप्तान विनोद भण्डारीले अर्धशतकीय इनिङ खेले । उनले ७९ बलमा ४ चौका र २ छक्काको सहयोगमा ५४ रनमा आउट भए । यस्तै विक्रम सोब ३९, अनिल मण्डलले २६ र अर्जुन साउदले १३ रन बनाए ।
गण्डकीका लागि विपिन खत्रीले सर्वाधिक ४ विकेट लिए । यस्तै कमल परियार २, सुवास भण्डारी, चन्द्र पौडेल र अमूत गुरुङले ११ विकेट लिए ।
उक्त जितसँगै आर्मीले ३ खेलबाट ४ अङ्क बनाउँदै सेमिफाइनलको सम्भावना कायम राखेको छ ।
पराजित गण्डकीको ४ खेलबाट ५ अङ्कसहित दोस्रो स्थानमा यथावत रहेको छ । यस समूहबाट एपीएफ क्लब तीन खेल जितेर सेमिफाइनलमा प्रवेश गरिसकेको छ । स्कोरकार्ड, अंकतालिका
यस्तै कीर्तिपुरस्थित टियु क्रिकेट मैदानमा आइतबार लुम्बिनीले प्रदेश-१ लाई ३९ रनले पराजित गरेको छ ।
लुम्बिनीले दिएको २ सय ९१ रनको लक्ष्यसहित जवाफी ब्याटिङ गरेको प्रदेश-१ ले ४६ ओभरमा अलआउट हुँदै २ सय ५१ रन मात्र बनाउन सक्यो ।
प्रदेश-१ का कप्तान सिद्धान्त लोहनीले ७४ रनको अर्धशतकीय इनिङ खेलेपनि टोलीलाई जित दिलाउन सकेनन् । अङ्कित सुवेदीले ५२ रनको अर्धशतकीय इनिङ खेल्दा निरज मुखियाले ४६ रन बनाए । सोनु मण्डलले अविजित २० र सर्वन यादवले १५ रन बनाए ।
लुम्बिनीका दुर्गेश गुप्ता, बसिर अहमेद र देव खनालले २/२ विकेट लिए ।
त्यसअघि टस जितेर पहिले ब्याटिङ गरेको लुम्बिनीले ५० ओभरमा ८ विकेट गुमाएर २ सय ९० रन बनाएको थियो । लुम्बिनीका लागि कप्तान देव खनालले ८९ रनको अर्धशतकीय इनिङ खेले । आकाश त्रिपाठीले ४५ रन जोड्दा सन्दीप रजालीले ४४ रन बनाए ।
विशाल विक्रम केसीले ३२ र कृष्ण कार्कीले ३१ रन बनाए । बसिर अहमदले १३ रन जोडे ।प्रदेश-१ का दीपक जोशीले ४ तथा सर्वन यादवले २ विकेट लिए ।
जितसँगै लुम्बिनी ४ खेलमा ४ अङ्कसहित तेस्रो स्थानमा रहेको छ ।
प्रदेश-१ तिन खेलमा हार र एक जित सहित प्रतियोगिताबाट बाहिरिएको छ ।
