- विकेटनेपाल, माघ ६ – आइतबार
पहिलो एकदिवसीयमा दक्षिण अफ्रीकालाई ५ विकेटले पराजित गर्दै पाकिस्ताले ५ एकदिवसीयको सिरिजमा १-० को अग्रता लिएको छ।
शनिवार राति पोर्ट एलिजाबेथमा सम्पन्न खेलमा टस जितेर ब्याटिंग गरेको दक्षिण अफ्रीकाले निर्धारित ५० ओभरमा २ विकेट गुमाएर २६६ रनको योगफल तयार गरेको थियो। २६७ रनको लक्ष्य पाकिस्तानले ५ विकेट गुमाएर पुरा गर्यो।
लक्ष्य पछ्याउने क्रममा पाकिस्तानको लागि ओपनर इमाम उल हकले सर्वाधिक ८६ रन ( १०१ बलमा ५ चौका र २ छक्का ) बनाए। यस्तै मोहम्मद हफिजले अविजित ७१ रन बनाउन ६३ बलमा २ छक्का र ८ चौका प्रहार गरे। बाबर आजमले ४९ रन बनाए।
४३ औं ओभरमा पाकिस्तान २२३/५ को अवस्थामा पुग्दा मोहम्मद हफिजले सातौँ नम्बरका ब्याट्सम्यान शदाब खानसंग ४४ रनको साझेदारी गर्दा पाकिस्तानले ५० औं ओभरको पहिलो बलमा जित हाँसिल गरेको थियो।
अन्तिम २ ओभरमा जितको लागि १४ रन आवस्यक हुँदा डुएन ओलिभरको ओभरमा १३ रन बटुलेपछि जित सहज बनेको थियो। शदाबले अविजित १८ रन बनाउन १९ बलमा १ चौका प्रहार गरे।
हफिज खेलको प्लेयर अफ द म्याच चुनिए।
हसिम अमलाको शतक
यस अघि दक्षिण अफ्रिकाले ओपनर हसिम अमलाको शतकको मद्दतमा निर्धारित ५० ओभरमा २ विकेट गुमाएर २६६ रनको योगफल तयार गरेको थियो।
एकदिवसीय करियरको २७ औं शतक प्रहार गरेका अमलाले अविजित १०८ रनको पारि खेले। १२० बलमा ७ चौका र १ छक्का हिर्काउँदै रिजा हेन्ड्रिक्ससँग पहिलो विकेटको लागि ८२ रनको साझेदारी गरे। हेन्ड्रिक्स भने ४५ रन (६७ बल, ५ चौका) बनाउँदै शादब खानको बलमा आउट भए।
![](https://wicketnepal.com/wp-content/uploads/2019/01/hasim-amla.jpg)
त्यसपछि एकदिवसीय क्रिकेटमा डेब्यु गरेका रसीई भानडेर डसेनले ९३ रनको पारि खेल्दै अमलासँग दोश्रो विकेटको लागि १५५ रनको साझेदारी गरेका थिए। डसेनले ६ चौका र ३ छक्का प्रहार गर्न ११० बलको सामना गर्दा हसन अलिको बलमा क्याच आउट भएका थिए।
![](https://wicketnepal.com/wp-content/uploads/2019/01/Rassie-van-der-Dussen.png)
तेस्रो विकेटको लागि डेविड मिलरले अविजित १६ रन बनाउँदै अमलासँग २९ रनको साझेदारी गरे।
बलिंगतर्फ पाकिस्तानका लागि शादाब खानले ४१ रन (१०-०-४१-१) तथा हसन अलिले ४२ रन (१०-२-४२-१) खर्चेर १/१ विकेट हात पारे।
५ खेलको सिरिज अन्तर्गत दोश्रो एकदिवसीय जनवरी २२ तारिकमा डर्बनमा खेलिनेछ। यस अघि सम्पन्न ३ टेस्टको सिरिज दक्षिण अफ्रीकाले ३-० ले जितेको थियो।
( फोटोहरु – आईसीसी र दक्षिण अफ्रीका क्रिकेट )