प्रधानमन्त्री कप एकदिवसीय क्रिकेट प्रतियोगिता अन्तर्गत चौथो दिनको मुलपानी मैदानमा सम्पन्न खेलमा पारस खड्का कप्तानीको प्रदेश-३ ले प्रदेश-५ लाई ६ विकेटले पराजित गरेको छ।
समुह ‘ए’ अन्तर्गत रहेको प्रदेश-३ को प्रतियोगितामा यो पहिलो जित हो। यस अघि एपीएफसंग प्रदेश-३ ४१ रनले पराजित भएको थियो। अंकतालिका
खेलमा टस जितेर प्रदेश-३ ले फिल्डिंग रोजेपछि ब्याटिंग गरेको प्रदेश-५ ले कमजोर ब्याटिंग गर्ने क्रममा ४२ ओभरमा १२२ रनमा सम्पूर्ण विकेट गुमाएको थियो। १२३ रनको लक्ष्य प्रदेश-३ ले २१.५ ओभरमा ४ विकेट गुमाएर पुरा गर्यो।
प्रदेश-३ को लागि ओपनर रित गौतम र रबिन जोशीले पहिलो ७२ रनको ओपनिंग साझेदारी गर्दै जितको आधार तयार गरेका थिए। रितले ३७ र रबिनले ३५ रन बनाए। इशान पाण्डेले अविजित २१ र आदील खानले अविजित १२ रन बनाउदै टिमलाई जितसम्म पुर्याए। पारस खड्का १ र अभिषेक बस्नेत २ रन बनाएर आउट भए।
प्रदेश-५ को बलिंगमा अनिल खरेल ( ३-०-२६-२ ) र सिद्धान्त शाहीले ( ४-१-१६-२ ) २/२ विकेट लिए।
पारस खड्का र सुर्य तामांगको उत्कृस्ट बलिंग
यस अघि पहिले ब्याटिंग गर्ने क्रममा प्रदेश-५ लाई १२२ रनमा सिमित गर्न कप्तान पारस खड्काले ४ र सुर्य तामांगले ३ विकेट लिए।
पारसले १० ओभरमा ३ मेडन ओभर गर्दै २४ रन खर्चिए भने तामांगलले १० ओभरमा ३ ओभरनै मेडन गर्दै १६ रन खर्चिए। यस्तै नन्दन यादबले २ विकेट ( ८-१-३१-२ ) र प्रतिश जिसीले १ विकेट ( १०-४-२५-१ ) लिए।
प्रदेश-५ को लागि ब्याटिंगमा शुबेन्दु पाण्डेले सर्वाधिक २० रन बनाए भने सुरज दराईले १८, सन्दिप सुनारले १४ र सौरभ खनालले १३ रन बनाए। प्रदेश-३ ले अतिरिक्तको रुपमा २२ रन खर्चेको थियो।
( फिचर फोटो , फाइल – पारस खड्का )
