आईसीसी एकदिवसीय बिश्वकप छनौट प्रतियोगिता अन्तर्गत दोश्रो खेलमा स्कटल्याण्डको सामना गरेको नेपालले खराब ब्याटिंग प्रस्तुत गरेको छ।
सुरुवाती ५ विकेट ३९ रनको स्कोरमा ८ ओभरमै गुमाएपछि कप्तान पारस खड्काले अर्धशतक बनाएर सम्हालेको नेपाली इनिंग पारसको विकेट पछि पुनः खराब अवस्थामा पुगेको छ। लिस्ट ‘ए’ क्रिकेटमा हजार रन प्रहार गर्ने क्रममा लिस्ट ‘ए’ को सातौँ अर्धशतक पुरा गरेपछि पारस ६३ रन व्यक्तिगत स्कोरमा आउट भए। ७५ बलको सामना गरेको पारसले १० चौका प्रहार गरेका थिए।
यो समाचार तयार पार्दा नेपालले ३२ ओभरमा १११ रनको स्कोरमा ७ विकेट गुमाएको छ। रोहित पौडेल ११ रन तथा बसन्त रेग्मी ५ रनमा ब्याटिंग गरिरहेका छन्।
यस अघि ओपनर ज्ञानेन्द्र मल्ल ( १ ) र दिलिप नाथ ( ४ ) चाडैनै आउट भएपछि ब्याटिंग गर्न आएका दिपेन्द्र ऐरी ( १ ) , शरद भेसावकर ( ० ) तथा आरिफ शेख ( २ ) आउट भएपछि नेपालले ५ जना ब्याट्सम्यानलाई ३९ रनको कुल योगफलमै गुमाएको थियो। पाँचौं विकेट गुमेपछि पारसले सोमपाल कामिसंग छैठौं विकेटको लागि ४२ रनको साझेदारी गरेका थिए। सोमपाल २५ औ ओभरमा टिमको योगफल ८१ रन हुँदा व्यक्तिगत १८ रनमा रन आउट भए।
नेपाललाई नाजुक स्थितिमा पुर्याउन स्कटल्याण्ड ओपनिंग बलर स्टुवार्ट व्हिटिंगघमले ३ विकेट लिने क्रममा दिलिप नाथ, दिपेन्द्र ऐरी र शरद भेसावकरलाई पेभेलियन पठाए । यस्तै सफ्यान शरिफ र रिचीबेरिंगटनले समान १/१ विकेट हात पारेका छन्।
प्रतियोगिताको पहिलो २ खेलमा स्कटल्याण्डले अफगानिस्तान र हंगकंगलाई पराजित गरिसकेको छ भने नेपालले पहिलो खेलमा जिम्बाबेसंग हार बेहोरेको थियो।
