प्रधानमन्त्री कप क्रिकेट प्रतियोगिता अन्तर्गत पाँचौ दिनको टियु मैदानमा जारि खेलमा गण्डकी प्रदेश र प्रदेश नम्बर-३ प्रतिस्पर्धा गरिरहेका छन्।
पारस खड्काले कप्तानी गरिरहेको प्रदेश-३ पहिलो इनिंगमा गण्डकी प्रदेश बिरुद्ध हावी भएको छ। टस जितेर पहिले ब्याटिंग गर्ने क्रममा उसले ३०.१ ओभरमा सबै विकेट गुमाएर १०८ रन मात्र बनाउन सकेको हो।
सानो योगफलमा गण्डकीलाई समेट्न देब्रे हाते स्पिनर सुर्य तामांग र अफस्पिनर पारस खड्काले ४/४ विकेट लिए। तामांगले ८.१ ओभरमा १ मेडन ओभर गर्दै २९ रन खर्चिए भने खड्काले ८ ओभरमा १ मेडन गर्दै १८ रन खर्चिए। नन्दन यादबले २ विकेट ( ७-०-२२-२ ) लिए।
गण्डकीका ओपनर अनिल गुरुङ र राहुल शर्माले पहिलो विकेटको लागि २८ रन बनाएपनि त्यसपछि पारस खड्काले लगातार ४ विकेट लिंदै गण्डकीको माथिल्लो क्रम ध्वस्त बनाएका थिए। अनिल ७ र राहुल १२ रन बनाएर आउट भए भने बिधान श्रेष्ठले २ र मेख बहादुर सेनले ५ रन बनाए।
त्यसपछि सुर्य तामांगले बिशाल पौडेल ( ० ) र गोभिन्द प्रधान ( ३ ) को विकेट लिंदा २८/१ बाट गण्डकी ५०/६ को खराब अवस्थामा पुग्यो।
सातौँ विकेटको लागि आकास थापा र सुमन घिमिरेले ५३ रनको साझेदारी गर्दै टिमको योगफल १०० पार गराए। २८ औं ओभरमा नन्दन यादबले सुमनको विकेट लिंदा गण्डकीले पुनः लगातार विकेट गुमायो।
सुमन ३४ रन ( ३२ बलमा १ चौका र ३ छक्का ) बनाएर आउट भए भने एक किनार सम्हालीरहेका आकास थापा २८ रन ( ४६ बलमा २ चौका ) बनाएर आउट भए।
फलस्वरूप ३०.१ ओभरमा गण्डकीले १०८ रनमा सबै विकेट गुमाउन पुग्यो।
प्रदेश-३ ले प्रतियोगितामा २ खेल खेल्दा एपीएफसंग हार बेहोर्दा प्रदेश-५ लाई पराजित गरेको छ। गण्डकी प्रदेशको यो पहिलो खेल हो।
राष्ट्रिय टिमका कप्तान पारस खड्का र उपकप्तान ज्ञानेन्द्र मल्ल पहिलो पटक प्रदेश-३ को लागि प्रतियोगिता खेलीरहेका छन्।
