नेपालको उमेर समुह राष्ट्रिय टिमको प्रतिनिधित्व गरेका सप्तरीका क्रिकेटर पवन दासलाई कोरोना संक्रमण देखिएको छ।
दास आफैले फेसबुक स्टाटस मार्फत संक्रमण भएको बताएका छन्। उनले फेसबुकमा कोरोना रिपोर्ट पोजेटिभ आएको बताउदै साउन १५ गते देखि आफ्नो सम्पर्कमा आउनेहरुलाई सुरक्षित रहन आग्रह गरेका छन्। आफुलाई निको हुने विश्वास समेत उनले व्यक्त गरेका छन्।
सप्तरी क्रिकेट संघका अध्यक्ष आयुष श्रेष्ठले विकेटनेपाललाई जानकारी दिए अनुसार दास सहित उनको बुवा र आमालाई समेत कोरोना संक्रमण देखिएको छ। दासको श्रीमती र छोरिको पनि पिसीआर परिक्षण गरिएको छ जसको रिपोर्ट आउन बाँकी रहेको छ।
हाल सप्तरीमा व्यवसाय गर्दै आएका दासले सन् २००२ मा नेपाली अन्डर-१५ तथा २००४ मा अन्डर-१७ नेपाली राष्ट्रिय टिमको प्रतिनिधित्व गरेका थिए। बायाँ हाते ओपनिंग ब्याट्सम्यान ब्याट्सम्यान दासले २००२ को अन्डर-१५ एसिया कपमा टेस्ट राष्ट्र बंगलादेश यु-१५ बिरुद्ध ६२ रन बनाएका थिए। दासले सोहि प्रतियोगितामा भारत बिरुद्ध २९ रन बनाएका । सो प्रतियोगितामा नेपाल सेमीफाइनलसम्म पुगेको थियो र पाकिस्तानसंग सेमीफाइनलमा नेपाल २७ रनले पराजित भएको थियो।
राम्रो प्रदर्शन गरेका कारण दास २००२ यु-१५ एसिया कपको एसीसीले घोषणा गरेको ड्रिम टिममा समेत परेका थिए। प्रतियोगितामा उनले ८ खेलमा कुल २०९ रन बनाएका थिए। दास सहित राज श्रेष्ठ, पारस खड्का र शरद भेसावकर उक्त ड्रिम टिममा पर्न सफल भएका थिए।
दासले गत वर्ष सप्तरीमा सम्पन्न सप्तरी प्रिमियर लिग प्रतियोगितामा बोदे बर्साईन थन्डर्सको प्रतिनिधित्व गरेका थिए।
नेपालमा हालसम्म २२ हजार ५ सय ९२ जनामा कोरोना संक्रमण देखिएको छ जसमध्ये १६ हजार ३ सय १३ जना निको भएका छन् भने ७३ जनाको मृत्यु भएको छ।
यो पनि पढ्नुस :-
सन्दिप लामिछाने सहित सिपिएल टि-२० खेल्न यात्रा गर्ने १६२ जनाको रिपोर्ट नेगेटिभ
