एघारौं सिजनको बिग ब्यास लिगको उपाधि पर्थ स्करचर्सले जितेको छ। पर्थले चौंथो पटक उपाधि आफ्नो नाम गरेको हो। पर्थ यस अघि २०१३/१४, २०१४/१५, २०१६/१७ सिजनको विजेता बनेको थियो।
मेलबर्नको डकल्यान्ड्स स्टेडियममा पर्थले सिड्नी सिक्सर्सलाई ७९ रनले पराजित गर्यो जुन क्रममा पर्थले दिएको १७२ रनको लक्ष्य पछ्याउने क्रममा सिड्नीले १६.२ ओभरमा ९२ रनमै समेटियो।
लक्ष्य पछ्याउने क्रममा सिड्नी ब्याट्सम्यान ड्यानियल ह्युज्सले सर्वाधिक ४२, निकोलस बेर्टसले १५ तथा जे लेन्टनले १० रन बनाए। अन्य ब्याट्सम्यानले दोहोरो अंकमा रन बनाउन सकेनन्। ६२ रनमा ३ विकेट गुमाएको सिड्नीले थप ३० रन जोड्दा सम्पूर्ण विकेट गुमाउन पुग्यो।
पर्थको बलिंगमा दायाँ हाते पेसर एन्ड्रयु टाईले सर्वाधिक तिन विकेट ( ३-०-१५-३ ) लिए। झाई रिचर्डसनले दुई विकेट तथा जेसन बेर्हनडर्फ, एस्टन टर्नर, पिटर ह्याटजोग्लु र एस्टन एगरले समान एक विकेट लिए।
टस हारेर ब्याटिंग गरेको पर्थले २० ओभरमा ६ विकेट क्षेतीमा १७१ रन बनाएको थियो। २५ रनमा ४ विकेट गुमाएको अवस्थाबाट एस्टन टर्नर र लौरी इभान्सले शतकीय ( १०४ रन ) साझेदारी गरे। इभान्सले ४१ बलमा ४ चौका र ४ छक्का मद्दतले अविजित ७६ रन तथा टर्नरले ३५ बलमा ४ चौका र १ छक्का मद्दतले ५४ रन बनाए।
सिड्नी बलर स्टिभ ओकिफ र नाथन लायनले समान दुई विकेट तथा ज्याकसन बर्ड र हेडन केरले समान एक विकेट लिए।
