प्रदेश नम्बर-१ लाई ७ विकेटले पराजित गर्दै विभागीय टोलि शशस्त्र प्रहरी बल ( एपीएफ ) ले प्रधानमन्त्री कप महिला राष्ट्रिय टि-ट्वान्टी प्रतियोगिताको उपाधि जितेको छ। गत संस्करणको फाइनलमा एपीएफलाई पराजित गर्दै प्रदेश-१ ले उपाधि जितेको थियो।
धनगढीको फाप्ला क्रिकेट मैदानमा सम्पन्न खेलमा प्रदेश-१ ले दिएको ६८ रनको लक्ष्य एपीएफले ३ विकेट क्षेतीमा १४.२ ओभरमै भेटायो।
एपीएफको लागि ज्योति पाण्डेले अविजित ३६ तथा ममता चौधरीले अविजित १९ रन योगदान दिईन्। ३५ रनमा ३ विकेट गुमेको अवस्थामा ज्योति र ममताले अविजित ३३ रनको साझेदारी गरे। प्रदेश-१ को बलिंगमा रुबिना क्षेत्रीले ३ विकेट हात पारिन् जुन क्रममा ४ ओभरमा १ मेडन ओभर गर्दै १० रन खर्चिन्।
यस अघि टस हारेर ब्याटिंग गरेको प्रदेश-१ ले २० ओभरमा ६ विकेट गुमाउदै ६७ रन मात्र बनाउन सक्यो। रुबिना क्षेत्रीले ३४ तथा अप्सरी बेगमले ११ रन बनाउनु बाहेक अन्य ब्याटरले दोहोरो अंकमा रन बनाउन सकेनन्।
एपीएफको बलिंगमा सिता राना मगरले ३ विकेट ( ४-०-१२-३ ) , रेखा रावलले २ विकेट ( ४-०-११-२ ) तथा करुना भण्डारीले १ विकेट ( ४-१-१३-१ ) हात पारिन्।
उपाधि सहित विजेता एपीएफले ५ लाख रुपैयाँ तथा उपविजेता प्रदेश-१ ले ३ लाख रुपैयाँ हात पार्यो।
