- विकेटनेपाल, बैशाख-२२
तेश्रो संस्करणको प्रधानमन्त्री कप एकदिवसीय क्रिकेट प्रतियोगिता जेठ १ गते देखि काठमाडौँको किर्तिपुर मैदानमा सुरु हुने भएको छ। राष्ट्रिय खेलकुद परिषदले आयोजना गर्ने प्रतियोगिता जेठ २४ गतेसम्म संचालन हुनेछ।
प्रतियोगितामा ३ वटा विभागीय र ७ वटा प्रदेश गरि कुल १० टिमको सहभागिता रहनेछ। सहभागी १० टिमलाई २ समुहमा बिभाजन गरिनेछ। २ वटा समुहमा एकले अर्को टिमसंग १/१ खेल खेलेपछि दुवै समुहबाट उत्कृस्ट २ टिमले सेमीफाइनल खेल्नेछन्।
प्रतियोगिताको विजेता टिमले २० लाख रुपैयाँ तथा उपविजेताले १० लाख रुपैयाँ प्राप्त गर्नेछन्। यस्तै प्रतियोगिताको उत्कृस्ट खेलाडीले मोटरसाइकल तथा उत्कृस्ट बलर र ब्याट्सम्यानले ५० हजार रुपैयाँ प्राप्त गर्नेछन्।
प्रतियोगितामा खेल हेर्न जाने दर्शकहरुको लागि समेत यो पटक प्रोत्साहन गर्न छक्का हानेको बल १ हातले क्याच गर्नेलाई रु. ५० हजार प्रदान गरिनेछ। एभरेस्ट प्रिमियर लिग र धनगढी प्रिमियर लिगले पनि यस अघि यस्तै प्रयोग गरिसकेको छ।
१ करोड ७५ लाख अनुमानित खर्च रहने प्रतियोगिताको लागि राष्ट्रिय खेलकुद परिषदले ८० लाख रुपैयाँ उपलब्ध गराउनेछ भने अन्य खर्च प्रायोजन मार्फत जुटाईनेछ।
प्रतियोगिताको पहिलो संस्करणको उपाधि नेपाल पुलिस क्लब र त्रिभुवन आर्मी क्लबले संयुक्त रुपमा जितेको थियो भने दोश्रो संस्करणको उपाधि शशस्त्र प्रहरी बल एपीएफले जितेको थियो।
