बागमती प्रदेशलाई ७ विकेटले पराजित गर्दै लुम्बिनी प्रदेशले प्रधानमन्त्री कप महिला टि-२० राष्ट्रिय प्रतियोगितामा विजयी सुरुवात गरेको छ। दिनको पहिलो खेलमा प्रदेश-१ ले कर्णाली प्रदेशलाई १६० रनले पराजित गरेको थियो।
धनगढीको फाप्ला मैदानमा समुह ‘ए’ अन्तर्गको खेलमा बागमती प्रदेशले दिएको ७६ रनको लक्ष्य लुम्बिनी प्रदेशले १२.५ ओभरमा मात्र ३ विकेट क्षेतीमा भेटायो।
लक्ष्य पछ्याउने क्रममा सरस्वति जीएमले सर्वाधिक अविजित २९ रन बनाईन् जुन क्रममा २५ बलमा ५ चौका प्रहार गरिन्। नितु भण्डारीले १४ तथा सरस्वति प्पुनले अविजित ९ रन बनाईन्। बागमती प्रदेशको बलिंगमा अश्मिना कर्माचार्य, आरति बिडारी र खुसि डंगोलले समान एक विकेट लिईन्।
यस अघि टस जितेर ब्याटिंग गरेको बागमतीले २० ओभरमा ७ विकेट क्षेतीमा ७५ रन बनाएको थियो। बागमतीको ब्याटिंगमा ओपनर हेलिशा गुरुङ बाहेक अन्यले दोहोरो अंकमा रन बनाउन सकेनन्। खुसि डंगोलले अविजित ९ तथा कन्चन श्रेष्ठले ७ रन बनाए।
लुम्बिनीका बलर मधु डीसीले सर्वाधिक ३ विकेट ( ४-०-१३-३ ) हात पारिन्। यस्तै सुष्मिता भुसालले २ ( ४-०-१७-२ )तथा नेरी थापा ( ४-१-१४-१ ) र स्वस्तिका बजगाईले ( ४-०-१५-१ ) समान एक विकेट हात पारिन्।
प्रतियोगिता अन्तर्गत दोश्रो दिन आइतबार पहिलो खेलमा बिहान ९ बजे लुम्बिनी प्रदेश र कर्णाली प्रदेश तथा दोश्रो खेलमा दिनुसो १ बजे प्रदेश-१ र बागमती प्रदेशले प्रतिस्पर्धा गर्नेछन्।
पुस ३ गतेदेखि ११ गतेसम्म सञ्चालन हुने प्रतियोगितामा आठ टोलीको सहभागिता छ। सहभागी टोलीलाई दुई समूहमा विभाजन गरिएको छ । समूह ‘ए’ मा प्रदेश १, लुम्बिनी प्रदेश, बागमती प्रदेश र कर्णाली प्रदेश रहेको छ । समूह ‘बी’ बाट नेपाल एपीएफ क्लब, गण्डकी प्रदेश, सुदूरपश्चिम प्रदेश र प्रदेश २ ले प्रतिस्पर्धा गर्दैछन् । दुवै समूहका टोलिहरुले एकअर्कासंग एक-एक खेल खेलेपछि अंकतालिकामा उत्कृस्ट हुने दुई/दुई टिमले सेमीफाइनलमा प्रतिस्पर्धा गर्नेछन्।
