धनगढीको फाप्ला क्रिकेट मैदानमा जारि प्रधानमन्त्री कप महिला टि-ट्वान्टी राष्ट्रिय प्रतियोगिता अन्तर्गत दोश्रो दिन पनि समुह ‘ए’ अन्तर्गतका दुई खेल हुँदैछन्।
दिनको पहिलो खेल बिहान ९ बजे लुम्बिनी प्रदेश र कर्णाली प्रदेश बीच हुनेछ। यस्तै दोश्रो खेल दिउँसो १ बजे प्रदेश-१ र बागमती प्रदेश बीच हुनेछ। दुवै खेलको प्रत्यक्ष प्रशारण एक्सन स्पोर्ट्स एच डीले गर्नेछ।
प्रदेश-१ र लुम्बिनी प्रदेशले आफ्नो-आफ्नो पहिलो खेलमा जित दर्ता गरिसकेका छन्। प्रदेश-१ ले शनिवार कर्णाली प्रदेशलाई १६० रनले पराजित गरेको थियो भने लुम्बिनी प्रदेशले बागमती प्रदेशलाई ७ विकेटले पराजित गरेको थियो। आज प्रदेश-१ र लुम्बिनी प्रदेश विजयी भए दुवै टिम एक खेल अगावै सेमीफाइनल पुग्नेछन्।
यस्तै आफ्नो पहिलो खेलमा पराजित भएका कर्णाली प्रदेश र बागमती प्रदेशलाई सेमीफाइनल सम्भावना जीवित राख्न जित अत्यावश्यक छ।
पुस ३ गतेदेखि सुरु भएर पुष ११ गतेसम्म सञ्चालन हुने प्रतियोगितामा आठ टोलीको सहभागिता छ। सहभागी टोलीलाई दुई समूहमा विभाजन गरिएको छ । समूह ‘ए’ मा प्रदेश १, लुम्बिनी प्रदेश, बागमती प्रदेश र कर्णाली प्रदेश रहेको छ । समूह ‘बी’ बाट नेपाल एपीएफ क्लब, गण्डकी प्रदेश, सुदूरपश्चिम प्रदेश र प्रदेश २ ले प्रतिस्पर्धा गर्दैछन् । दुवै समूहका टोलिहरुले एकअर्कासंग एक-एक खेल खेलेपछि अंकतालिकामा उत्कृस्ट हुने दुई/दुई टिमले सेमीफाइनलमा प्रतिस्पर्धा गर्नेछन्।
