राष्ट्रिय खेलकुद परिषद (राखेप)ले पोखरा रंगशाला स्थित क्रिकेट खेल मैदानको निर्माणका लागि एक करोड खर्च गर्ने भएको छ ।
पोखरा रंगशाला क्रिकेट मैदान निर्माणका लागि राखेपले आर्थिक वर्ष २०७८/०७९ मा एक करोड खर्च गर्ने भएको हो । नवौं राष्ट्रिय खेलकुदको तयारी स्वरुप राखेपले पोखरा रंगशालाको क्रिकेत खेल मैदानका लागि एक करोड विनियोजन गरेको उल्ले गरेको छ । आर्थिक वर्ष २०७६/०७७ मा राखेपले २ करोड र गण्डकी प्रदेश सरकारले एक करोड गरी ३ करोड विनियोजन गरेको भए पनि नभई निर्माण शुरु हुन अगावै कोभिड महमारीका कारण उक्त रकम फ्रिज हुन पुगेको थियो ।
कास्की जिल्ला क्रिकेट संघका अध्यक्ष सञ्जयकान्त सिग्देलले उक्त रकम प्राथमिकताका आधारमा खर्च गरिने बताए-“आव २०७६/०७७ मा ३ करोड फिर्ता हुँदा हामीलाई निकै ठूलो चोट परेको छ । हामीले धेरै चरणमा योजनाहरु बनाएका थियौं । प्यारापिट निर्माण गर्ने सम्मको योजना थियो तर रकम फिर्ता हुँदा हामीलाई दुःख लागेको थियो ।”
नवौंको तयारीका लागि विनियोजित एक करोड अव ग्राउण्ड लेभलिङ पहिलो प्राथमिकता रहेको अध्यक्ष सिग्देलले बताए । उनले भने–“यो एक करोडले जति काम हुन सक्छ हामी गर्छौं । ग्राउण्ड लेभलिङ सङ्गै प्लेयर बक्स र नालीको निर्माण समेत गरिने छ ।”
एशियामानै उत्कृष्ट मध्येको पोखरा रंगशालाको क्रिकेट खेल मैदान स्टोररुम, चेन्जिङ रुम र प्लेयर बक्स समेत नहुँदा टुहुरो बन्न परेको छ । १३ औं दक्षिण एशियाली खेलकुद (साग)मा महिला क्रिकेट समेत आयोजना भइसकेको पोखरा क्रिकेट खेल मैदानमा पोखरा प्रिमियर लिग, प्रदेश, जिल्ला र स्थानिय स्तरका प्रतियोगिताहरु आयोजना हुँदै आइरहेका छन्।
( साभार – पोखरास्पोर्ट्स )
