काठमाडौँमा जारि प्रधानमन्त्री कप एकदिवसीय क्रिकेट प्रतियोगिता अन्तर्गत नवौं दिनको टियु मैदानमा जारि खेलमा विभागीय टोलिहरु नेपाल पुलिस क्लब र त्रिभुवन आर्मी क्लबले प्रतिस्पर्धा गरिरहेकका छन्।
खेलमा टस हारेर पहिले ब्याटिंग गरेको पुलिसले ४८.४ ओभरमा सम्पूर्ण विकेट गुमाएर १६१ रन बनाउदै आर्मीलाई १६२ रनको लक्ष्य प्रस्तुत गरेको छ।
ढिलो विकेटमा खराब सुरुवात गर्ने क्रममा पुलिसले पहिलो ३ विकेट २४ रनको योगफलमै गुमाउन पुगेको थियो। प्रतियोगितामा पुलिसको लागि यस अघिको खेल नखेलेका सुनिल धमलाले पहिलो पटक मौका पाउदा त्यसको सदुपयोग गर्न सकेनन् र ५ रन बनाएर आउट भए। यस्तै अघिल्लो खेलमा शतक बनाएका अमित श्रेष्ठ ४ तथा अनिल साह १३ रन बनाएर आउट भए।
चौथो विकेटको लागि दिपेन्द्र ऐरी र दिलिप नाथले ३७ रनको साझेदारी गरे। दिलिप १४ रन बनाएर आउट भए जस लगत्तै दीपेन्द्र पनि २९ तथा कुशल भुर्तेल ५ रन बनाएर आउट भए।
९४/७ ( ३१.३ ओभर ) को नाजुक अवस्थामा पुगेको पुलिसको लागि त्यसपछि कप्तान मन्जित श्रेष्ठ र आरिफ शेखले अर्धशतकीय साझेदारी गर्दै योगफल १५० पार गराए। ३४ रन ( ५४ बलमा २ चौका ) बनाएर आरिफ ४६ औं ओभरमा आउट हुन पुगे।
मन्जित श्रेष्ठले ३६ रन बनाएर अन्तिम सम्म अविजित रहे। श्रेष्ठले ६२ बलमा ३ चौका र १ छक्का प्रहार गरे।
आर्मीको बलिंगमा देब्रे हाते स्पिनर शाहब आलमले सर्वाधिक ४ विकेट लिए जुन क्रममा १० ओभरमा २ मेडन ओभर गर्दै ३० रन खर्चिए। यस्तै करन केसीले २ ( ९.४-०-३६-२ ) र जितेन्द्र मुखिया, सुशन भारि र कुशल मल्लले १/१ विकेट लिए।
समुह ‘बि’ अन्तर्गत आर्मीले यस अघि ३ वटै खेलमा जित हाँसिल गर्दै सेमीफाइनलमा स्थान पक्का गरिसकेको छ भने पुलिसले २ खेलमा २ वटै जित दर्ता गरेको छ।
