एभरेष्ट प्रिमियर लिग ( ईपीएल ) को आयोजक जोहरा इन्टरनेसनले अप्रिल ८ देखि १६ तारिख ( चैत २५ देखि बैशाख ३ गते ) सम्म भैरहवामा ‘प्रो क्लब च्याम्पियनसिप’ टि-२० क्रिकेट प्रतियोगिता आयोजना गर्ने भएको छ।
नेपालले पपुवा न्यु गिनी र मलेसियासंग खेल्ने त्रिकोणात्मक टि-ट्वान्टी सिरिज समाप्त भएलगत्तै क्लब च्याम्पियनसिप आयोजना हुनेछ। मंगलबार भैरहवामा पत्रकार सम्मेलनमाझ प्रतियोगिता घोषणा गरिएको हो।
प्रतियोगितामा नेपाल लगायत भारत, बंगलादेश र मलेसियाका स्तरीय क्लबहरुको सहभागिता रहने बताईएको छ। केहि दिन भित्रै सहभागी क्लबहरुको नाम घोषणा गरिनेछ। कुल ८ वटा क्लबहरुको सहभागिता रहने आयोजकले जानकारी गरएको छ।
५२ वर्षको उमेरको भर्खरै निधन भएका अस्ट्रेलियाका क्रिकेट लेजेण्ड शेन वार्नलाई समर्पित गर्दै प्रतियोगिता आयोजना गरिन लागिएको हो।
पत्रकार सम्मेलनमा बोल्दै पूर्व राष्ट्रिय क्रिकेटर तथा जोहराका प्रबन्ध निर्देशक आमिर अख्तरले क्लब क्रिकेटलाई प्रवर्द्धन गर्नु महत्वपूर्ण रहेको बताए – “एक पूर्व राष्ट्रिय क्रिकेटरको नाताले म घरेलु क्रिकेटमा क्लब क्रिकेटलाई प्रवर्द्धन गर्नुपर्छ भन्ने कुरामा विश्वास गर्छु। दशक अघि सम्म क्लब क्रिकेट नेपालमा प्रतिभा उत्पादन गर्ने मूख्य श्रोत थियो। म क्रिकेटलाई विकेन्द्रित गर्नुपर्छ भन्ने पक्षमा छु त्यसैले भैरहवामा आयोजना गर्न लागेका हौँ। हामीलाई थाहा छ भैरहवाको क्लब क्रिकेटको इतिहास लामो छ जहाँ यो प्रतियोगिता हुनु वास्तवमै लायकको छ।”
प्रतियोगितालाई नेपाल क्रिकेट संघले मान्यता प्रदान गरिसकेको छ भने रुपन्देही क्रिकेट एसोसिएसनले प्राविधिक सहयोग गर्नेछ। अस्ट्रेलियन दुतावास समेत प्रतियोगितालाई साथ दिएको छ।
