विकेटनेपाल, चैत्र २२ – बिहिबार । धनगढी प्रिमियर लिग (डिपिएल) क्रिकेट अन्तर्गत बिहिबार भएको दोश्रो खेलमा पुनित बिस्टको अलराउन्ड प्रदर्शनले महेन्द्रनगर युनाईटेडले प्रतियोगिता अन्तर्गत तेस्रो खेलमा दोश्रो जित हात पारेको छ । यस्तै लगातार चौथो हारसँगै रुपन्देही च्यालेंजर्सको सेमीफाइनल प्रवेश गर्ने सम्भावना सकिएको छ ।
रुपन्देहीले दिएको १४५ रनको लक्ष्य महेन्द्रनगरले १८.५ ओभरमा मात्र ६ विकेट गुमेर पुरा गरेको थियो । उसको जितमा कप्तान बिनोद भण्डारीले ६१ रन बनाउन ४८ बलमा ५ चौका र २ छक्का प्रहार गरे भने पुनित बिस्टले २२ बलमा ३ चौका र ४ छक्का सहित ४५ रनको आक्रामक पारि खेले । पुनित मेहराले १६ बलमा अविजित १६ रन बनाउँदा रोहितकुमार पौडेलले ५ बलमा १ छक्का सहित ७ रन बनाए।
बलिंगतर्फ पनि महेन्द्रनगरका लागि म्यान अफ द म्याच समेत घोषित पुनित बिस्टले ४ ओभर बलिंग गर्दै मात्र १२ रन खर्चेर ४ विकेट हात पारेका थिए जसको मद्दतले रुपन्देहीले ८ विकेट गुमाएर मात्र १४४ रनको योगफल तयार पार्न सकेको थियो। यसअघि टस जितेर पहिले ब्याटिंग गरेको रुपन्देहीले प्रदीप ऐरीको ३९ रन (३२ बल, ५ चौका, १ छक्का), सागर पुनको २८ रन (१६ बल, १ चौका, ३ छक्का) को मद्दतमा २० ओभरमा १४४/८ को स्कोर बनाएको थियो ।
बलिंगतर्फ रुपन्देहीका दिपेश श्रेष्ठले ३ विकेट लिन २५ रन तथा सुशन भारीले २ विकेट लिन ३२ रन खर्चिएपनि जितको लागि पर्याप्त हुन सकेन ।
