देब्रे हाते स्पिनर ललित राजबंशीले घातक बलिंग गर्दा प्रधानमन्त्री कप राष्ट्रिय एकदिवशीय क्रिकेट प्रतियोगितामा नेपाल पुलिस क्लबले लगातार दोस्रो जित हासिल गरेको छ ।
समूह बी अन्तर्गत मूलपानी मैदानमा सोमबार सम्पन्न खेलमा पुलिसले प्रदेश-१ लाई ७ विकेटले हराएको हो ।
१०३ रनको लक्ष्य पुलिसले १४ ओभरमा ३ विकेट गुमाउँदै पूरा गरेको हो । ओपनर सुनिल धमला रनको खाता नखोली आउट भए पनि अर्का ओपनर कुशल भुर्तेल र शङ्कर रानाले पुलिसको जित आधार तय गरेका थिए । यी दुईले दोस्रो विकेटका लागि ६९ रनको साझेदारी गरे ।
कुशलले २८ बलमा ५ चौका र ३ छक्का सहित सर्वाधिक ४२ रन बनाए । अर्का ब्याटर सङ्करले २९ रन बनाए । दिपेन्द्र सिंह ऐरी र रसिद खान क्रमशः १४ र १६ रनमा अविजित रहे । प्रदेश १ का लागि फिरोद अन्सरी र सिद्धान्त लोहनीले समान १ विकेट लिए ।
यसअघि टस जितेर ब्याटिङ गरेको प्रदेश १ टिम ३५.१ ओभरमा १०२ रनमै अलआउट भएको थियो । पुलिसका लागि ललितनारायण राजवंशी एक्लैले ५ विकेट लिए । उनले १० ओभरमा ३ मेडन राख्दै २६ रन खर्चिए । दिपेन्द्र सिंह ऐरी र सागर ढकालले समान २ विकेट लिए भने रसिद खानले १ विकेट लिए ।
प्रदेश १ का लागि ओपनर ब्याटरद्धय निरज मुखिया र अङ्कित सुवेदीले पहिलो विकेटका लागि ५६ रनको साझेदारी गरेका थिए । निरजले ३७ बलमा २९ रन बनाए भने अङ्कितले ३५ बलमा २४ रन जोडे । बाँकी ४६ रन जोड्दा बाँकी सबै विकेट गुमायो ।
पुलिस २ खेलबाट ४ अङ्कसहित समूह बी को शीर्ष स्थानमा पुगेको छ । पुलिसले यसअघि आइतबार भएको पहिलो खेलमा बागमती प्रदेशमाथि १९२ रनको जित हाँसिल गरेको थियो।
