काठमाडौं । क्यानडामा जारी ग्लोबल टि ट्वान्टी लिगमा नेपाली राष्ट्रिय क्रिकेट टिमका कप्तान रोहितकुमार पौडेल सम्मिलित टोरोन्टो नेसनल्स पराजित भएको छ ।
लिग चरणको अन्तिम खेलमा टोरोन्टो मोन्ट्रियल टाइगर्ससँग ७ विकेटले पराजित भएको हो ।
टोरोन्टोले दिएको ५३ रनको लक्ष्य टाइगर्सले ११.३ ओभरमा ३ विकेट गुमाएर पूरा गर्यो ।
टाइगर्सका लागि कप्तान टिम साइफर्टले १५ बलमा अविजित १५, ओपनर दिलप्रित बाज्वाले १६ बलमा १२ रन बनाए ।
टोरोन्टोका लागि जोसेन बेहराड्राफ्ट, जतिन्द्रपाल माथुरु, जुनैद सिद्धिकीले समान १ विकेट लिए ।
त्यसअघि टस हारेर पहिले ब्याटिङ गरेको टोरोन्टो ११.१ ओभरमा ५२ रनमा अल आउट भयो । नेपाली कप्तान रोहितलाई भने टोरोन्टोले यस खेलमा पनि बेन्चमा राखेको थियो ।
टोरोन्टोका लागि जतिन्द्रपाल मथुरुले सर्वाधिक १२ रन बनाए । टोरोन्टोका अन्य ब्याटरले दोहोरो अंकमा रन बनाउँन सकेनन् ।
टाइगर्सका लागि कलिम सानाले ४, अजमतुल्लाह उमरजाइले ३ तथा आयान खानले १ विकेट लिए ।
रोहित सम्मिलित टोरोन्टोले हारका बाबजुद प्लेअफमा स्थान पक्का गरेको छ ।
