काठमाडौं । १७ औं संस्करणको फाइनलमा स्थान बनाउँन राजस्थान रोयल्सले सनराईजर्स हैदराबादबाट १ सय ७६ रनको लक्ष्य पाएको छ ।
चेन्नईमा रहेको एम ए चिदम्बरम क्रिकेट स्टेडियममा जारी दोस्रो क्वालिफायर खेलमा टस हारेर पहिले ब्याटिङ गरेको हैदराबादले २० ओभरमा ९ विकेट गुमाएर १ सय ७५ रन बनायो ।
हैदराबादका लागि हेनरिक क्लासेनले ३४ बलमा ४ छक्काको सहयोगमा ५० रनको अर्धशतकीय ईनिङ खेले । राहुल त्रिपाठीले १५ बलमा ५ चौका र २ छक्काको सहयोगमा ३७ रन बनाए । ट्राभिस हेडले २८ बलमा ३ चौका र १ छक्काको सहयोगमा ३४ रन बनाए ।
राजस्थानका लागि ट्रेन्ट बोल्ट र आवेश खानले समान ३/३ तथा सन्दीप शर्माले २ विकेट लिए ।
पहिलो क्वालिफायरमा कोलकाता नाइट राईडर्ससँग पराजित हुदै हैदराबादले दोस्रो क्वालिफायर खेल्दैछ । हैदराबादलाई पराजित गरेको कोलकाताले भने फाइनलमा स्थान सुरक्षित गरिसकेको छ ।
उता, राजस्थान भने इलिमिनेटर खेलमा रोयल च्यालेन्जर्स बेंगलुरुलाई हराउँदै दोस्रो क्वालिफायरका लागि छनोट भएको हो । समूह चरणमा भएको खेलमा हैदराबाद १ रनले विजयी भएको थियो ।
यस खेलको विजेताले आइपीएल फाइनलमा स्थान बनाउँने छ । विजयी टोली आइतबार हुने फाइनल खेलमा कोलकातासँगको भेट पक्का गर्नेछ ।
