फिचर फोटो: फाइल (शाहब आलम बलिंग गर्दै)
- विकेटनेपाल, बैशाख १० – सोमबार
दिपक गुप्ता मेमोरियल टि-२० क्रिकेट प्रतियोगिता अन्तर्गत सोमबार सम्पन्न २ वटा खेलमा फोनिक्स क्रिकेट क्लब र त्रिभुवन आर्मी क्लबले जित हात पारेका छन् । फोनिक्सले युनाईटेड क्रिकेट क्लबलाई २ रनले (स्कोरकार्ड) र आर्मीले एपिएफलाई ९ विकेटले (स्कोरकार्ड) पराजित गरेका हुन् । समूह ‘ए’ मा रहेको फोनिक्सको यो दोश्रो जित हो भने समूह ‘बि’ मा पहिलो खेल भएको थियो ।
राजिंदर लालको अर्धशतकमा फोनिक्सको दोश्रो जित
टस जितेर पहिले ब्याटिंग गरेको फोनिक्सले निर्धारित २० ओभरमा ५ विकेट गुमाएर १४१ रन बनाएको थियो । उसका लागि मुजिबुर अलिले ३१ बलमा ५ चौका सहित ३० रन तथा म्यान अफ द म्याच रहेका राजिंदर लालले ५५ बलमा ३ चौका र १ छक्का सहित ५० रन बनाउंदै पहिलो विकेटको लागि ५२ रनको साझेदारी गरेका थिए । बलिंगतर्फ युनाईटेडका रशिद खान, राजा सिंह र हसिम अन्सारीले १/१ विकेट लिएका थिए ।
जवाफमा १४२ रनको लक्ष्य सहित मैदानमा उत्रेको युनाईटेडले निर्धारित २० ओभरमा ९ विकेट गुमाएर १३९ रनमात्र बनाउन सक्यो । उसका लागि इशान पाण्डेले २८ रन, राजा सिंहले २४ र अशु कन्डोईले २३ रन बनाएपनि जितबाट २ रनले चुक्यो । बलिंगतर्फ बिकाश भण्डारीले २ विकेट लिन १७ रन खर्चे ।
शाहब आलमको बलिंगमा घुम्यो एपीएफ
टस हारेर पहिले ब्याटिंग गरेको एपीएफले निर्धारित २० ओभरको खेलमा १ बल अगावै सबै विकेट गुमाएर मात्र ७६ रन बनाउन सकेको थियो । उसका लागि प्रनित थापा मगरले १३ रन, भुवन कार्कीले १२ रन र रोहित पौडेलले ११ रन बनाएपनि म्यान अफ द म्याच घोषित आर्मीका शाहब आलमले ५ विकेट लिन ४ ओभरमा मात्र १२ रन खर्चेका थिए ।
जवाफमा लक्ष्य पछ्याएको आर्मीका लागि सागर पुनले ५७ रन (३४ बल, ८ चौका, २ छक्का) प्रहार गरेपछि मात्र ११ ओभरमा १ विकेट गुमाएर पुरा गरेको थियो । सागर पुन पहिलो विकेटको लागि नरेश बुढाऐर (अविजित १५) सँग ७४ रनको साझेदारी गर्दै पवन सर्राफको बलमा आउट भएका थिए ।
