भारतीय टिमका उदयमान तिब्र गति बलर नभदिप सैनीलाई वेस्टइन्डिजसंगको पहिलो टि-२० अन्तर्राष्ट्रिय दौरान आईसीसी कोड अफ कन्डक्टको उल्लङ्घन गरेको आरोपमा कारवाही गरिएको छ। २६ वर्षीय बलरले सोहि खेलमा डेब्यु गरेका थिए र ३ विकेट लिंदै उत्कृस्ट समेत चुनिएका थिए।
खेलाडीको लागि आईसीसीको कोड अफ कन्डक्ट अन्तर्गत धारा २.५ उल्लङ्घन गरेको कारण उनलाई कारवाही स्वरूप डी-मेरिट अंक समेत प्रदान गरिएको छ। यो धारामा बिपक्षी ब्याट्सम्यान आउट हुँदा खेलाडीले शारीरिक हाउभाउ प्रयोग गरेर रिस व्यक्त गर्नु या जिस्कनु रहेको छ।
अन्तर्राष्ट्रिय क्रिकेटमा सन् २०१६ बाट प्रयोगमा आएको डी-मेरिट अंक खेलाडीको अनुसासन कायम गर्न प्रयोग गरिने मापदण्ड हो। अन्तर्राष्ट्रिय क्रिकेटमा २४ महिनाको समयमा कुनै खेलाडीले ४ डी-मेरिट अंक बटुलेमा १ टेस्ट वा २ सिमित ओभर क्रिकेट खेलबाट निलम्बन गर्ने नियम छ।
आफुले गल्ति गरेको सैनीले म्याच रेफ्री जेफ क्रोसंग स्वीकार गरिसकेको आईसीसीले जारि गरेको विज्ञप्तिमा बताईएको छ।
खेलको चौथो ओभरमा २० रन बनाएका निकोलस पुरनलाई विकेटकिपर रिशभ पन्तबाट क्याच आउट गराएपछि सैनीले पुरनलाई बाहिर जानको लागि ‘सेन्ड अफ’ इशारा गरेका थिए।
सैनीले पहिलो टि-२० मा मात्र १७ रन खर्चेर ३ विकेट लिएपछि वेस्टइन्डिज मात्र ९५ रनमा समेटिन पुगेको थियो र खेल भारतले खेल ४ विकेटले जितेको थियो। दोश्रो टि-२० मा भने विकेटविहिन रहेका सैनीले ३ ओभरमा २७ रन खर्चेका थिए।
१४०-१५० सम्म बलिङ्ग गर्न सक्ने सैनीले आफ्नो प्रदर्शनबाट प्रभावित बनाएका छन्। उनले आईपीएलमा रोयल च्यालेन्जर्स बैंगलोरको प्रतिनिधित्व गरेका थिए जुन क्रममा ११ विकेट लिएका थिए।
Navdeep Saini has received an official warning for breaching Level One of the ICC Code of Conduct during India’s first T20I game against West Indies in Florida.https://t.co/uqLH3fEJVz
— ICC (@ICC) August 5, 2019
२०१७-१८ को रणजी क्रिकेट सिजनमा दिल्लीको लागि ८ खेलमा ३४ विकेट लिएपछि उनलाई त्यही सिजन आईपीएलमा दिल्लीले लिएको थियो। त्यसपछि गत सिजन अक्सनमा उनलाई बैंगलोरले ३ करोड भारतीय रुपैयाँमा खरिद गरेको थियो।
