स्याम करनले कीर्तिमानी बलिंग गर्दा अफगानिस्तान बिरुद्ध ५ विकेटको जित दर्ता गर्दै इंग्ल्यान्डले अस्ट्रेलियामा जारि टि-ट्वान्टी विश्वकपमा विजयी सुरुवात गरेको छ।
सुपर-१२ चरण अन्तर्गत समुह ‘१’ को खेलमा अफगानिस्तानले दिएको ११३ रनको सामान्य लक्ष्य इंग्ल्यान्डले ५ विकेट गुमाएर १८.१ ओभरमा भेटायो।
इंग्ल्यान्डको लागि लियाम लिभिंग स्टोनले सर्वाधिक २९ रन बनाए। एलेक्स हेल्सले १९ तथा जोस बटलर र डेविड मलानले समान १८ रन बनाए। अफगानिस्तान बलर फजलहक फारुकी, मुजिब उर् रहमान, राशिद खान, फरिद मलिक र मोहम्मद नाबीले १/१ विकेट लिए।
यस अघि टस हारेर ब्याटिंग गरेको अफगानिस्तानले १९.४ ओभरमा ११२ रन मात्र बनाउन सक्यो। उसको लागि इब्राहिम जद्रानले ३२, उस्मान घानीले ३० रन योगदान दिए। १०९ रनमा ५ विकेट गुमाएको अवस्थामा स्याम करनले घातक बलिंग गर्दा थप ३ रन जोड्दा अफगानिस्तान अलआउट भयो।
स्याम करनले करियरकै उत्कृस्ट स्पेल दर्ता गर्ने क्रममा ३.४ ओभरमा १० रन खर्चेर ५ विकेट लिए। उनले अठारौं र बीसौं ओभरमा २/२ विकेट लिए। बेन स्टोक्स र मार्क वुडले २/२ तथा क्रिस वोक्सले १ विकेट लिए।
करनले इंग्ल्यान्डको लागि टि-ट्वान्टी अन्तर्राष्ट्रियमा ५ विकेट लिने पहिलो कीर्तिमान आफ्नो नाम गरेका छन्।
सुपर-१२ चरण अन्तर्गत आजको पहिलो खेलमा न्युजिल्यान्डले अस्ट्रेलियालाई ८९ रनले पराजित गर्दै विजयी सुरुवात गर्यो।
सुपर-१२ चरणको समुह ‘१’ मा अफगानिस्तान, अस्ट्रेलिया, आयरल्याण्ड, न्युजिल्यान्ड र श्रीलंका छन् भने समुह ‘२’ मा बंगलादेश, भारत, नेदरल्याण्ड, पाकिस्तान, दक्षिण अफ्रीका र जिम्बाब्वे छन्। सबै टिमले एक अर्का बिरुद्ध १/१ खेल खेले पछि समुहको उत्कृस्ट दुई टिम सेमीफाइनल पुग्नेछन्।
