भारतीय क्रिकेट कन्ट्रोल बोर्ड (बीसीसीआई)ले महिला क्रिकेटरलाई पनि पुरुष खेलाडीकै सरह म्याच फी दिने भएको छ ।
(बीसीसीआई)का सचिव जय साहले बिहिबार ट्वीट गर्दै अब महिला क्रिकेटरलाई पनि पुरुष खेलाडीकै सरह म्याच फी दिने घोषणा गरेका हुन् । यसै वर्ष न्युजिल्यान्ड क्रिकेट बोर्डले पनि पुरुष र महिला राष्ट्रिय टिमका खेलाडीलाई समान म्यान फि दिने घोषणा गरेको थियो।
‘मलाई यो घोषणा गर्दै गर्दा खुसी लागेको छ कि बीसीसीआईले भेदभाव अन्त्यका लागि पहिलो कदम उठाएको छ,’ उनले ट्वीट गरेका छन्, ‘हामीले बीसीसीआईसँग अनुबन्ध क्रिकेटर्सका लागि पे-इक्विटी पोलिसी लागू गरेका छौँ, महिला तथा पुरुष दुवै क्रिकेटर्सको लागि म्याच फी बराबर हुने छ ।’
भारतीय पुरुष खेलाडीले एउटा टेष्ट म्याचको १५ लाख भारु ( २४ लाख नेपाली रुपैयाँ ) , एक दिवसीय अन्तर्राष्ट्रिय खेलको ६ लाख भारु ( ९ लाख ६० हजार नेपाली रुपैयाँ ) र टी-२० म्याचको ३ लाख भारतीय रुपैयाँ ( ४ लाख ८० हजार नेपाली रुपैयाँ ) म्याच फी पाउँदै आएका छन् । अब महिला क्रिकेटरले पनि सोही अनुसार म्यान फि पाउने छन् ।
सन् २०१७ को आईसीसी महिला विश्वकपको फाइनल पुगेपछि भारतीय महिला क्रिकेट टिमको लोकप्रियता ह्वात्तै बढेको हो। त्यसपछि २०२० को टि-२० विश्वकप मा पनि भारतीय महिला टिम फाइनल पुगेको थियो।
