- विकेटनेपाल, भदौ १९
हंगकंगसंग ३ विकेटले पराजित हुँदै नेपाल एसिया कप छनौट प्रतियोगिताको फाइनल पुग्न असफल भएको छ भने अधिकारी रुपमा नेपालको एसिया कप खेल्ने सम्भावना पनि सकिएको छ।
प्रतीयोगीताको ५ मध्ये ३ खेलमा हंगकंग, युएई र ओमानसंग पराजित भएको नेपालको प्रदर्शन कमजोर रहेपछि लिग चरणमा शिर्ष ३ भित्र पर्न समेत असफल रह्यो। नेपाललाई पराजित गर्दै हंगकंगले प्रतियोगिताको फाइनल पुग्ने सम्भावना बलियो बनाएको छ। अहिले जारि रहेको खेलमा यदी युएईले ओमानलाई पराजित गर्यो भने हंगकंग र युएई फाइनल पुग्नेछ।
सन्दिपले ५ विकेट लिंदा हंगकंगको कठिन जित
प्रतियोगिताको अन्तिम खेलमा नेपालले टस जितेर ब्याटिंग गर्दै बनाएको ९५ रनको जवाफमा ब्याटिंग गरेको हंगकंगको जित सहज हुन सकेन। सन्दिप लामिछाने एक्लैले ५ विकेट लिंदा हंगकंगलाई हार्ने डर उत्पन्न भएको थियो। ८७ रनको स्कोरमा ७ विकेट गुमाएको हंगकंगले त्यसपछि भने विकेट गुमाएन र कठिन जित निकाल्यो।
सन्दिपले १० ओभर बलिङ्ग गर्दै २ मेडन ओभर सहित २७ रन खर्चेर ५ विकेट लिए। यस्तै बसन्त रेग्मी र सागर पुनले पनि १/१ विकेट लिए। हंगकंगको लागि ओपनर तथा कप्तान अन्शुमन रथले सर्वाधिक ५२ रन बनाए पनि अन्य ब्याट्सम्याहरुले खास योगदान दिन सकेनन्।
नेपालको कमजोर ब्याटिंग
हंगकंगसंग टस जितेको नेपालले ब्याटिंग गर्दै ठुलो लक्ष्य प्रस्तुत गर्दै फाइनल पुग्ने झिनो सम्भावना बनाउन चाहन्थ्यो तर सोचे अनुरुप नेपालको ब्याटिंग चलेन र सुरुवात देखि नेपालले विकेट गुमाउन थाल्यो।
इनिंगको दोश्रो बलमै सुबास खकुरेल खाता नखोल्दै आउट भए पछि कप्तान पारस खड्का ( १४ ) , अनिल साह ( १५ ) , ज्ञानेन्द्र मल्ल ( १२ ) , दिपेन्द्र ऐरि ( २ ) , सागर पुन ( ७ ) लगातार आउट भए। आरिफ शेखले १८ र बसन्त रेग्मीले अविजित १५ रन बनाएपनि स्कोर १०० पनि पार गर्न सकेन। हंगकंगले दिएको १० रन अतिरिक्तको मदतले नेपालले ३७.५ ओभरमा ९५ रनमा सबै विकेट गुमाउन पुग्यो।
हंगकंग बलर एहसान खानले ४ विकेट हात पार्न ७.५ ओभरमा १ मेडन ओभर बलिङ्ग गर्दै १५ रन मात्र खर्चिए। यस्तै तन्बिर अफजल र ऐजाज खानले समान २/२ विकेट हात पारे।
वर्षाको कारण आधा घण्टा ढिला सुरु भएको खेलमा नेपालले अघिल्लो खेलकै अन्तिम ११ जना खेलाडीलाई मौका दिएको थियो भने बिनोद भण्डारी, करन केसी, ललित भण्डारी र रोहित पौडेल बाहिर बसेका थिए।
खेलको फोटोहरु –
