काठमाडौं । क्यानडामा जारी ग्लोबल टि ट्वान्टी लिगमा नेपाली क्रिकेटरहरु सम्मिलित टिमहरुको खेल नतिजाबिहिन रुपमा सकिएको छ । शुक्रबार कप्तान रोहित कुमार पौडेल सम्मिलित टोरोन्टो नेसनल्सले मोन्ट्रियल टाइगर्ससँगको खेल नतिजा बिहिन रुपमा सकाएको हो ।
खेल ढिला सुरु हुँदा खेल ६ ओभरमा छोड्याईएको थियो । टाइगर्सले टस हारेर पहिले ब्याटिङ गरेको थियो । टाइगर्सले २ ओभरमा २ विकेट गुमाएर २५ रन बनाएको अवस्थामा भारी वर्षाका कारण खेल रोकिएको थियो । खेल पुनः सुचारु हुन नसके पछि दुवै टोलीले समान १ अंक बाडेका हुन् । नेपाली कप्तान रोहित भने यस खेलमा बेन्चमा रहेका थिए ।
शनिबार बिहान भएको नेपाली अलराउन्डर दीपेन्द्र सिंह ऐरी तथा लेग स्पिनर सन्दीप लामिछाने सम्मिलित भेनकुवर नाईट्सले सर्रे ज्याकवार्ससँग अंक बाडेको छ । भेनकुवरले पहिले ब्याटिङ गर्ने क्रममा ५ ओभरमा १ विकेट गुमाएर २८ रन बनाउँदा वर्षाका कारण खेल रोकिएको थियो । खेल पुनः सुचारु हुन नसक्दा दुवै टोली समान १ अंक बाडे । भेनकुवरमा रहेका दीपेन्द्र र सन्दीपले भने यस खेलमा प्लेइङ-११ मा स्थान बनाएका थिए ।
भेनकुवर र टोरोन्टोबीचको अर्को खेल आईतबार बिहान एक आपसविरुद्ध रहेको छ ।
